पर्यटकीय पूर्वाधारबाट आम्दानीमा वृद्धि: रानीमहल र दरबार सङ्ग्रहालय बने मुख्य स्रोत

तानसेन, असोज ४ गते । पाल्पाको तानसेनस्थित रानीमहल, पाल्पा दरबार सङ्ग्रहालय र श्रीनगर डाँडा जस्ता ऐतिहासिक पर्यटकीय पूर्वाधारबाट स्थानीय तानसेन नगरपालिका र लुम्बिनी प्रदेश सरकारको आम्दानी बढ्दै गएको छ। पछिल्लो समय पर्यटन क्षेत्रमा लगानी र प्रचार-प्रसार प्रभावकारी हुँदा प्रवेश शुल्क तथा पार्किङ शुल्कबाट हुने राजस्वमा उल्लेखनीय वृद्धि भएको हो।

तानसेन नगरपालिकाका सूचना अधिकारी भरतप्रसाद आचार्यका अनुसार ऐतिहासिक स्थल रानीमहलबाट नगरपालिकाले आव २०८०/८१ मा ७१ लाख ६२ हजार, आ.व. २०८१/८२ मा ७४ लाख २४ हजार र आ.व. २०८२/८३ मा ९१ लाख ४९ हजार रुपियाँ आम्दानी गरेको छ। यस्तै, श्रीनगर डाँडाबाट गत आ.व. २०८२/८३ मा ११ लाख ४८ हजार रुपियाँ आम्दानी भएको छ।

त्यसैगरी, पाल्पा दरबार सङ्ग्रहालयको आम्दानीमा पनि निरन्तर वृद्धि भइरहेको छ। सङ्ग्रहालय प्रमुख टीकाराम न्यौपानेका अनुसार अवलोकनकर्ताको सङ्ख्या बढेसँगै प्रवेश, पार्किङ र क्यामरा शुल्कबाट आ.व. २०८१/८२ मा २८ लाख ४३ हजार रुपियाँ उठेकामा आव २०८२/८३ मा बढेर ३६ लाख ३७ हजार रुपियाँ पुगेको छ।

पर्यटकीय पूर्वाधारहरूले नगरपालिकाको प्रत्यक्ष राजस्व बढाउनुका साथै स्थानीय व्यापारिक चहलपहल र रोजगारीका अवसरहरू पनि सिर्जना गरेका छन्। तानसेन–५ का वडाध्यक्ष रामबहादुर रावलले आन्तरिक तथा बाह्य पर्यटकको आवागमनले नगरभित्रको समग्र अर्थतन्त्रलाई चलायमान बनाउन ठूलो सहयोग पुर्‍याएको बताउनुभयो।

पर्यटकीय स्थल अनुसारको आम्दानी विवरण: