भोटेकोशी बाढीका कारण सिद्धबाबा सुरुङमार्ग निर्माण प्रभावित: सञ्चालन योजना तीन महिना पछि धकेलियो

तानसेन, असोज ३ गते । गत भदौ १० गते गएको विनाशकारी भोटेकोशी बाढीका कारण सिद्धबाबा सुरुङमार्गको निर्माण कार्य प्रभावित बनेको छ।

सुरुङमार्गका लागि रसुवा नाका भएर ल्याइएका महत्त्वपूर्ण विद्युतीय सामग्री बाढीले बगाएपछि तथा बाँकी सामान वैकल्पिक बाटोबाट ल्याउनुपर्ने परिस्थितिका कारण आगामी कात्तिकभित्र सुरुङमार्ग सञ्चालन गर्ने योजना अब तीन महिना पछाडि धकेलिएको छ।

सिद्धबाबा सुरुङमार्ग निर्माणको ठेक्का पाएको चाइना स्टेट कन्स्ट्रक्सन इन्जिनियरिङ कर्पोरेसन ले हालसम्म मुख्य सुरुङको सिभिल कार्य सम्पन्न गरी विद्युतीकरण र प्रवेशद्वार निर्माणलाई अन्तिम चरणमा पुर्‍याएको छ।

सुरुङभित्र सवारी साधन गुडाउन योग्य भएसँगै आयोजनाको ७० प्रतिशत काम पूरा हुनेछ भने बाँकी ३० प्रतिशत काम सुरुङ बाहिरको ७८० मिटर जोखिमयुक्त क्षेत्रमा डबल लेन, बाइपास तथा साढे तीन किलोमिटर सडक सुरक्षित बनाउने रहनेछ।

कुल ७ अर्ब ३४ करोड २१ लाख ४० हजार रुपियाँ लागत रहेको १,१२६ मिटर लम्बाइको यो सुरुङमार्ग २०८१ माघ ११ गते ‘ब्रेक थ्रु’ भएको थियो। सिद्धबाबा क्षेत्रमा निरन्तर खस्ने पहिरोको जोखिम कम गर्न यो सुरुङमार्ग बुटवल–पाल्पा सडकखण्डको भरपर्दो र सुरक्षित वैकल्पिक माध्यम बन्ने अपेक्षा गरिएको छ।

सिद्धबाबा सुरुङमार्ग आयोजनाको अद्यावधिक विवरण