१० दिनपछि खुल्यो पृथ्वी राजमार्ग: कृष्णभिरमा भिर काटेर सञ्चालनमा ल्याइयो डाइभर्सन

नारायणगढ, भदौ २९ गते । कृष्णभिरमा सडक नै भासिएपछि १० दिनदेखि पूर्ण रूपमा अवरुद्ध रहेको पृथ्वी राजमार्ग आइतबारदेखि परीक्षणका रूपमा सञ्चालनमा ल्याइएको छ।

राजमार्ग भासिएको ठाउँ नजिकैको भिर काटेर नयाँ ‘डाइभर्सन‘ निर्माण गरिएपछि सडक सञ्चालनमा आएको हो। यससँगै देशको सङ्घीय राजधानी काठमाडौँ र तराईका जिल्लाहरूबीच टुटेको यातायात सम्पर्क पुनः जोडिएको छ।

नागढुङ्गा–मुग्लिङ सडक योजना (पश्चिम खण्ड) की प्रमुख सिनियर डिभिजन इन्जिनियर सजना अधिकारीका अनुसार सडक अवरुद्ध हुँदा अलपत्र परेका एलपी ग्यासका बुलेट, मालवाहक ट्रक र साना सवारीसाधनलाई पहिलो चरणमा पार गराइएको छ। आइतबार परीक्षणका रूपमा २५ भन्दा बढी सवारीसाधन पार गराइएको र सोमबार पनि अत्यावश्यक सवारीसाधनलाई निरन्तरता दिइने उहाँले जानकारी दिनुभयो।

आयोजनाका इन्जिनियर धिरण ढकालका अनुसार १० मिटर चौडाइ र २५२ मिटर लम्बाइको भिर काटेर यो नयाँ बाटो तयार पारिएको हो। जसका लागि भिरमा ५ मिटरदेखि १७ मिटरसम्मको उचाइ काटिएको छ। हाल परीक्षणका रूपमा मात्र गाडी चलाइएको र आगामी दिनमा सडकमा थप ग्राभेल हालेर स्तरोन्नति गर्दै पूर्ण रूपमा राजमार्ग सञ्चालन गरिने जनाइएको छ।

सडक पुनर्स्थापना र सञ्चालन