कृष्णभिर पहिरोको दीर्घकालीन समाधान टनेल निर्माण: ७०० मिटर टनेल बनाउन विज्ञहरूको सुझाव

मुग्लिन, भदौ २६ गते। पृथ्वी राजमार्गअन्तर्गत धादिङको कृष्णभिरमा पटक-पटक जाने पहिरो र सडक भासिने समस्याको दीर्घकालीन समाधानका लागि टनेल (सुरङमार्ग) निर्माण नै उपयुक्त विकल्प हुने विज्ञहरूले औँल्याएका छन्।

त्रिशूली नदीको कटान र भिरमा परेका चिराका कारण उच्च जोखिममा रहेको यस क्षेत्रमा करिब ७०० मिटर लामो टनेल निर्माण गरेमा पहिरोको जोखिम सधैँका लागि छल्न सकिने जियो टेक्निक सोसाइटी तथा सडक विभागका इन्जिनियरहरूले बताएका छन्।

२०५७ सालदेखि समस्या दिइरहेको कृष्णभिरमा गत भदौ १४ गते राजमार्ग भासिएपछि हाल यातायात प्रभावित छ। नदी किनारको १०० मिटर टेवा पर्खाल भत्किएर माटो बगाउँदा १२० मिटर लम्बाइ र नौ मिटर चौडाइमा सडक भासिएको थियो। अहिले ५ वटा स्काभेटर र २ वटा लोडर प्रयोग गरी डाइभर्सन निर्माणमार्फत सडक दोहोरो खुलाउने प्रयास भइरहेको छ।

कृष्णभिरका अतिरिक्त पृथ्वी राजमार्गका पोखरे खोला, झ्याल खोला, परेवा भिर लगायतका स्थान तथा नारायणगढ–मुग्लिन सडक खण्डका ४८ वटा पहिरो जोखिमयुक्त स्थानहरू (तुइन खोला, काली खोला आदि) मा पनि नियमित पहिरोको समस्या छ। विज्ञहरूका अनुसार सबै स्थानमा टनेल सम्भव नभएकाले अन्य जोखिमयुक्त भिरहरूमा भू-प्राविधिक संरचना र टेवा पर्खाल निर्माण गरी सडक संरक्षण गर्नुपर्ने देखिन्छ।