दाङमा वर्षाका कारण दुई करोड बढीको इँटामा क्षति

घोराही, चैत ८ गते । दाङमा बेमौसमी वर्षादका कारण दुई करोड बराबरको इँटामा क्षति भएको छ । चैत ६ र ७ गते दुई दिनसम्म परेको वर्षाले करिब ६६ लाखभन्दा बढी इँटा नष्ट हुँदा करिव दुई करोड दस लाख रुपियाँ बराबरको क्षति भएको हो ।

दाङ देउखुरी इँटा व्यवसायी संघका सचिव प्रकाश खड्काका अनुसार जिल्लामा सञ्चालित ३६ वटा इँटा उद्योगबाट उत्पादित कच्ची इटामा क्षति भएको छ । जिल्लाका विभिन्न स्थानमा रहेका ३६ वटा इँटा उद्योगले दैनिक प्रति उद्योग ५० देखि ८० हजारसम्मका दरले इँटा उत्पादन गर्दै आएका छन् ।

वर्षादका कारण सुक्दै गरेको र पोल्नका लागि तयारी अवस्थामा राखिएको इँटामा क्षति पुगेको सचिव खड्काले जानकारी दिनुभएको छ । वर्षादका कारण जिल्लामा भएको क्षतिको पूर्ण विवरण सङ्कलन हुने कार्य जारी रहेको भन्दै घोराही उपमहानगरपालिका–८ दुन्द्रामा रहेको ओम फिक्स चिम्नी इँटा उद्योगका सञ्चालक समेत रहनुभएका खड्काले भन्नुभयो, ‘‘इँटा भएको क्षतिको यकिङ विवरण सङ्कलन हुने क्रम जारी रहेको छ । दुई शुक्रबार र शनिबार परेको पानीले दुई करोड बराबरको क्षति हुन पुगेको अनुमान छ ।’

उहाँका अनुसार कच्ची इँटा तयार गर्दा करिव प्रति इँटा तीन रुपियाँ लागत खर्च लाग्ने गर्दछ । अन्य व्यवसाय जस्तो इँटा उद्योगमा बिमा सुविधा नहुँदा प्रत्येक वर्ष वर्षाका कारण व्यवसायीले ठुलो क्षति बेहोर्नुपर्ने र त्यसको असर उपभोक्तासम्म पर्ने गरेको व्यवसायी बताउँछन् ।