अवरुद्ध नेपाल टेलिकमको सेवा शीघ्र सञ्चालन गर्न सञ्चारमन्त्रीको निर्देशन: आवश्यकता अनुसार हेलिकप्टरमार्फत उपकरण ढुवानी गरिने

काठमाडौँ, असोज १३ गते । सूचना तथा सञ्चारमन्त्री डा. विक्रम तिमिल्सिनाले बाढी तथा पहिरोका कारण अवरुद्ध भएका नेपाल टेलिकमका दूरसञ्चार सेवाहरू शीघ्र पुनःसञ्चालनमा ल्याउन निर्देशन दिनुभएको छ।

सञ्चार मन्त्रालयका सचिव राजेन्द्रप्रसाद पौडेल र नेपाल टेलिकमका प्रबन्ध निर्देशक संगीता पहाडी (अर्याल) लगायत उच्च व्यवस्थापनसँग मन्त्रालयमा भएको छलफलमा मन्त्री तिमिल्सिनाले उक्त निर्देशन दिनुभएको हो।

छलफलका क्रममा मन्त्री तिमिल्सिनाले प्राकृतिक विपत्तिका कारण सञ्चार सेवा अवरुद्ध हुँदा नागरिक, उद्धारमा खटिएका सुरक्षाकर्मी र सरकारी निकायलाई ठूलो कठिनाइ हुने भएकाले सेवा पुनःस्थापनालाई उच्च प्राथमिकतामा राख्न ताकेता गर्नुभयो। केन्द्रीय विद्युत् आपूर्ति तत्काल पुर्‍याउन नसकिने दुर्गम स्थानहरूमा वैकल्पिक उपाय अपनाएर भए पनि सेवा सुचारु गर्न टेलिकम व्यवस्थापनलाई निर्देशन दिइएको छ।

नेपाल टेलिकमका प्रमुख सञ्चालन अधिकृत प्रेमप्रसाद सिलवालका अनुसार असोज ८ देखि ११ गतेसम्म परेको अविरल वर्षा र बाढी पहिरोका कारण विद्युत् आपूर्ति ठप्प हुँदा देशभर १ हजार १३२ वटा टेलिफोन टावरहरू प्रभावित भएका थिए। सडकमार्ग अवरुद्ध भएका र विद्युत् पुग्न नसकेका केही जटिल स्थानहरूमा हेलिकप्टरमार्फत जेनेरेटर, उपकरण र प्राविधिक जनशक्ति पुर्‍याएर सेवा सुचारु गर्ने तयारी भइरहेको छ।

टेलिकमले हालसम्म १ हजार २ वटा टावर पुनःसञ्चालनमा ल्याइसकेको छ भने १३० वटा साइट अझै बन्द अवस्थामा छन्। बन्द रहेका टावरहरूमा सबैभन्दा धेरै म्याग्दीमा २४, रोल्पामा १९, मनाङमा १५, प्युठानमा १५, बागलुङमा १३, पाल्पामा ११, गुल्मीमा ९, अर्घाखाँचीमा ७, दाङमा ६, मुस्ताङमा ४ र पर्वतमा ३ वटा रहेका छन्। बाँकी साइटहरूमा पनि प्राविधिक टोली खटाएर तीव्र रूपमा काम भइरहेको टेलिकमले जनाएको छ।