नेपाल एआईआईबीको उपाध्यक्षमा चयन: कतारको दोहामा अर्थमन्त्री डा. स्वर्णिम वाग्लेले सम्हाले जिम्मेवारी

काठमाडौँ, असोज १३ गते । एसियाली पूर्वाधार लगानी बैंक (एआईआईबी) को उपाध्यक्ष पदमा नेपाल चयन भएको छ। कतारको राजधानी दोहामा जारी बैंकको गभर्नर परिषद्को ११औँ वार्षिक बैठकका अवसरमा नेपाललाई आगामी वर्षका लागि गैरक्षेत्रीय सदस्य मुलुकतर्फको उपाध्यक्ष पदमा चयन गरिएको हो।

एआईआईबीको सङ्गठनात्मक संरचना अनुसार एक जना अध्यक्ष तथा क्षेत्रीय र गैरक्षेत्रीय सदस्य मुलुकहरूबाट एक-एक जना उपाध्यक्ष रहने व्यवस्था रहेको छ। यस पटक गैरक्षेत्रीय सदस्य समूहबाट नेपालसँगै आयरल्यान्ड पनि उपाध्यक्षमा चयन भएको छ।

वार्षिक बैठकका अवसरमा अर्थमन्त्री एवं एआईआईबीका लागि नेपालका गभर्नर डा. स्वर्णिम वाग्लेले उक्त जिम्मेवारी औपचारिक रूपमा ग्रहण गर्नुभएको छ।

बैठकको गभर्नर्स विजनेस राउन्डटेबललाई सम्बोधन गर्दै अर्थमन्त्री डा. वाग्लेले पूर्वाधारमार्फत हुने पुँजी निर्माण कम विकसित मुलुकहरूको आर्थिक वृद्धिको मुख्य आधार भएको बताउनुभयो। उहाँले सडक, विद्युत्, सञ्चार तथा सूचना प्रविधिमा लगानी विस्तार गर्नुपर्ने र नेपालजस्ता विकासशील मुलुकको आवश्यकता अनुसार बैंकको लगानीलाई अधिकतम सहुलियतपूर्ण बनाउनुपर्नेमा जोड दिनुभयो।