ताप्लेजुङको ४,२०० मिटर उचाइस्थित तिम्बुङ पोखरीमा पहिलोपटक प्रदर्शन गरियो केःलाङ (च्याब्रुङ) नृत्य

फुङ्लिङ, भदौ २७ गते । ताप्लेजुङको उच्च हिमाली क्षेत्रमा अवस्थित प्रसिद्ध तिम्बुङ पोखरी क्षेत्रमा पहिलोपटक लिम्बू समुदायको मौलिक नृत्य केःलाङ (च्याब्रुङ) प्रदर्शन गरिएको छ। समुद्री सतहदेखि करिब चार हजार दुई सय मिटरको उचाइमा आयोजित तिम्बुङ पोखरी अन्तर्राष्ट्रिय ट्रेल रन (हाफ म्याराथन) प्रतियोगिताको विशेष अवसर पारेर सो नृत्य प्रस्तुत गरिएको हो।

तिम्बुङ पोखरी पर्यटन विकास समितिका अध्यक्ष अमिर राईका अनुसार उच्च हिमाली क्षेत्रमा केःलाङ प्रदर्शन गर्नुको मुख्य उद्देश्य पर्यटन प्रवर्द्धनसँगै लिम्बू समुदायको मौलिक संस्कृति, परम्परा र पहिचानको संरक्षण गर्नु रहेको छ। सो अवसरमा च्याब्रुङको सुमधुर ताल र धुनमा स्थानीय तथा सहभागीहरूले उत्साहजनक रूपमा नृत्य प्रस्तुत गरेका थिए।

ताप्लेजुङको सिदिङ्वा गाउँपालिका–१ कालिखोलामा अवस्थित तिम्बुङ पोखरी क्षेत्रमा पहिलोपटक गरिएको यो सांस्कृतिक प्रस्तुतिले हाफ म्याराथनमा सहभागी राष्ट्रिय तथा अन्तर्राष्ट्रिय खेलाडी र पर्यटकहरूलाई प्राकृतिक सौन्दर्यका साथसाथै स्थानीय कला, संस्कृति र परम्परासँग नजिकबाट परिचित गराएको छ।