अन्नपूर्ण पदमार्गमा बढ्यो पर्यटकको चहलपहल: दुई सातामा आगमन दोब्बर, व्यवसायी उत्साहित

लमजुङ, भदौ २७ गते। वर्षायामसँगै केही समय सुस्ताएको विश्वविख्यात अन्नपूर्ण पदमार्गमा पर्यटकको चहलपहल पुनः बढ्न थालेको छ। पछिल्लो दुई साता यता पर्यटक आगमनमा उल्लेख्य सुधार भएसँगै पदमार्ग आसपासका होटल तथा पर्यटन व्यवसायीहरू उत्साहित भएका छन्। अघिल्लो साता करिब १५० पर्यटक प्रवेश गरेको धारापानी चेकपोस्टबाट पछिल्लो साता यो सङ्ख्या बढेर करिब ३०० पुगेको छ।

अन्नपूर्ण संरक्षण क्षेत्र आयोजना (एक्याप) धारापानीका अनुसार भदौ महिनामा हालसम्म ६१४ जना पर्यटक धारापानी भएर पदयात्रामा निस्किएका छन्, जसमध्ये ५१५ जना गैरसार्क र ९९ जना सार्क मुलुकका रहेका छन्।

विशेषगरी मनास्लु हिमाल आरोहण र पदयात्राका लागि आउने पर्यटकको सङ्ख्या बढेको छ। सन् २०२६ को जनवरी १ देखि सेप्टेम्बर ६ सम्म यस प्रवेशबिन्दुबाट २० हजार ९१७ जना पर्यटकले पदयात्रा सुरु गरिसकेका छन्।

असोजदेखि मङ्सिरसम्म अन्नपूर्ण पदमार्गको मुख्य पर्यटकीय सिजन मानिन्छ। वर्षायामको सुनसानपछि असोज र कात्तिकमा पर्यटकको चाप झनै बढ्ने अपेक्षा गर्दै स्थानीय व्यवसायीहरू स्वागत र सेवा सुविधाको तयारीमा जुटेका छन्। व्यवसायीहरूले पदमार्गको बाटोघाटो सुधारमा ध्यान दिन सके पर्यटक आगमन अझ बढ्ने बताएका छन्।

अन्नपूर्ण पदमार्ग (धारापानी) पर्यटक आगमन तथ्याङ्क: