कलाकार सविता डङ्गोलको ‘इटरनल हारमोनी’ प्रदर्शनी सुरु: बिक्रीको १० प्रतिशत बाढी प्रभावितलाई दिइने

काठमाडौँ, भदौ २१ गते । कलाकार एवम् भिज्युअल आर्टिस्ट सविता डङ्गोलको एकल चित्रकला प्रदर्शनी ‘इटरनल हारमोनी (अनन्त सद्भाव)’ दरबारमार्गस्थित ग्यालरी १०८ मा सुरु भएको छ।

श्रीकृष्ण जन्माष्टमीको अवसर पारेर आयोजित यस प्रदर्शनीमा राखिएका चित्रकलाको बिक्रीबाट प्राप्त हुने रकमको १० प्रतिशत बाढी प्रभावितहरूको राहतका लागि सहयोग गरिने आयोजक तथा कलाकारले जनाएका छन्।

प्रदर्शनीमा ४२ वटा कलाकृतिहरू राखिएका छन्, जसले मानवता, प्रकृति, आध्यात्मिकता, संस्कृति र सहअस्तित्वको गहिरो सन्देश दिएका छन्। डङ्गोलका सिर्जनामा कपाल कोर्ने काइँयोलाई समस्याको समाधानको विम्बका रूपमा मुख्य सिग्नेचर शैली बनाइएको छ। साथै, प्रदर्शनीमा मण्डला, मुजुर, अष्टमङ्गल कलश र जोडी आकृतिहरू प्रयोग गरी प्रकृति र धर्म-संस्कृतिको सन्तुलन प्रस्तुत गरिएको छ।

ग्यालरीका संस्थापक सुगतरत्न शाक्यका अनुसार बाढी प्रभावितका लागि ‘आर्ट फर रिलिफ’ अभियान पनि सञ्चालन भइरहेको छ, जसमा डङ्गोलले आफ्नो कृति दिएर सहयोग गर्नुभएको छ। त्रिभुवन विश्वविद्यालयबाट ललितकलामा एमएफए गर्नुभएकी कलाकार डङ्गोलले सन् २००७ देखि राष्ट्रिय तथा अन्तर्राष्ट्रिय कला क्षेत्रमा निरन्तर सक्रिय रहँदै आउनुभएको छ।