मकवानपुरमा स्कारपियो दुर्घटना

हेटौँडा, २ भदौ (सेतोप्रेस) — मकवानपुरको भीमफेदी गाउँपालिका–६ जुरिखेलमा मंगलबार बिहान भएको स्कारपियो दुर्घटनामा उच्च अदालत जनकपुरको अस्थायी इजलास वीरगन्जका न्यायाधीश गोकर्ण डाँगीसहित ६ जना घाइते भएका छन्।

काठमाडौँबाट वीरगन्जतर्फ आउँदै गरेको प्रदेश ३–०१–००२ झ ५१८३ नम्बरको स्कारपियो सडकबाट करिब ५०–६० मिटर तल खोल्सामा खस्दा उनीहरू घाइते भएका हुन्। दुर्घटनामा गाडी पूर्ण रूपमा कच्याककुचुक परेको छ।

घाइतेमध्ये गम्भीर अवस्थाकी लक्ष्मी बडूसहित न्यायाधीश डाँगी र अन्य ३ जनालाई थप उपचारका लागि नेपाली सेनाको हेलिकप्टरमार्फत काठमाडौँ लगिएको जिल्ला प्रहरी कार्यालय मकवानपुरले जनाएको छ। यसैगरी, सवारी चालक छुनिलाल चौधरी र रजिष्ट्रार तारादत्त बडुलाई थप उपचारका लागि हेटौँडा अस्पताल ल्याइएको प्रहरी नायव उपरीक्षक (डीएसपी) माधव काफ्लेले जानकारी दिए।

को–को थिए गाडीमा?
प्रहरीका अनुसार दुर्घटनामा परेको गाडीमा चालकसहित ६ जना सवार थिए। घाइते हुनेहरूमा:
१. गोकर्ण डाँगी (५७) – न्यायाधीश, उच्च अदालत वीरगन्ज (तुलसीपुर–९, दाङ)
२. तारादत्त बडु (५१) – रजिष्ट्रार, उच्च अदालत वीरगन्ज (दशरथचन्द–७, बैतडी)
३. लक्ष्मी बडु (४९) – तारादत्तकी श्रीमती (अवस्था गम्भीर)
४. रितेन्द्र बडु (२५) – तारादत्तका छोरा
५. रिता बडु (३१) – तारादत्तकी दिदी
६. छुनिलाल चौधरी (३२) – चालक (राप्ती–८, दाङ)

प्रहरीका अनुसार लक्ष्मी बडुको अवस्था गम्भीर रहेको छ भने अन्य पाँच जनाको अवस्था मध्यम छ।

कसरी थाहा भयो र उद्धार कसरी भयो?
दुर्घटनाको खबर प्राप्त भएलगत्तै इलाका प्रहरी कार्यालय भीमफेदीबाट ट्राफिक प्रहरीसहित ७ जनाको टोली घटनास्थल पुगेको थियो। उनीहरूले स्थानीयको सहयोगमा गाडीभित्रबाट घाइतेहरूलाई उद्धार गरी नजिकैको भीमफेदी अस्पतालमा पुर्याएका थिए। त्यहाँ प्राथमिक उपचारपछि गम्भीर र मध्यम खालका घाइतेलाई सुविधासम्पन्न अस्पतालमा रिफर गरिएको हो।

घटनाको जानकारी पाएपछि जिल्ला प्रहरी कार्यालय मकवानपुरका प्रहरी उपरीक्षक (एसपी) श्यामबहादुर खत्री नेतृत्वको टोलीसमेत घटनास्थलमा पुगेर अनुसन्धान सुरु गरेको ट्राफिक प्रहरी कार्यालय मकवानपुरका प्रमुख इन्सपेक्टर रमेश विष्टले बताए। गाडी सडकबाट अचानक अनियन्त्रित भई तल खसेको अनुमान गरिए पनि दुर्घटनाको यकिन कारण भने खुल्न सकेको छैन। प्रहरीले घटनास्थलको मुचुल्का गरी थप अनुसन्धान गरिरहेको जनाएको छ