एसियन गेम्स २०२६ : नेपाल समूह ‘ए’ मा, भारत–पाकिस्तानसँगको भेट सम्भावित

काठमाडौँ, असार ७ गते – जापानमा आयोजना हुने २०औँ एसियन गेम्सको पुरुष क्रिकेट प्रतियोगिताको समूह विभाजन सार्वजनिक भएको छ । आयोजकले बिहीबार गरेको घोषणाअनुसार नेपाली पुरुष क्रिकेट टोली समूह ‘ए’ मा रहने भएको हो । यस समूहमा नेपालसँगै आयोजक जापान र बलियो टोली अफगानिस्तान रहेका छन् ।

यस्तै समूह ‘बी’ मा हङकङ, मलेसिया र ओमान राखिएका छन् । भारत, बङ्गलादेश, श्रीलङ्का र पाकिस्तान भने सिधै क्वार्टरफाइनलमा स्थान पक्का गरेका छन् । समूह चरणको शीर्ष दुई टोलीले क्वार्टरफाइनलमा प्रवेश पाउनेछन् । यदि नेपाल समूह ‘ए’ बाट छनोट भएमा क्वार्टरफाइनलमा भारत, पाकिस्तान, बङ्गलादेश वा श्रीलङ्का जस्ता शक्तिशाली टोलीसँग खेल्ने मौका पाउनेछ ।

यसअघि चीनमा सम्पन्न १९औँ एसियन गेम्समा नेपालले क्वार्टरफाइनलमा भारतको सामना गरेको थियो । सो खेलमा नेपाल पराजित भएको थियो । यसपटक नेपाली टोलीले त्यो हारको बदला लिने र इतिहास रच्ने लक्ष्य राखेको छ । एसियन गेम्सका सबै क्रिकेट खेलहरू टी–२० ढाँचामा आयोजना हुनेछन् । नेपालको पहिलो खेल तालिका आयोजकले पछि सार्वजनिक गर्ने जनाएको छ । क्रिकेट प्रशंसकहरू नेपाली टोलीको प्रदर्शनमा आशावादी छन् ।