नेपाल आयल निगमको कार्यकारी निर्देशक पदका लागि आवेदन खुला

ठमाडौं – नेपाल आयल निगमको कार्यकारी निर्देशक पदपूर्तिका लागि उद्योग, वाणिज्य तथा आपूर्ति मन्त्रालयले आधिकारिक आवेदन प्रक्रिया सुरु गरेको छ। गत वैशाख ३० गते तत्कालीन कार्यकारी निर्देशक डा. चण्डिकाप्रसाद भट्टले राजीनामा दिएपछि रिक्त रहेको यो पदका लागि मन्त्रालयले मंगलबार सार्वजनिक सूचना जारी गर्दै योग्य नेपाली नागरिकहरूलाई आवेदन माग गरेको हो।

आवेदन दिने म्याद र योग्यता

इच्छुक उम्मेदवारले विज्ञापन प्रकाशित भएको मितिले २१ दिनभित्र आवेदन बुझाउनु पर्नेछ। सोही अवधिभित्र मन्त्रालयले प्रचलनमा रहेको कार्यविधिअनुसार नै आवेदन प्रक्रिया अघि बढाउने जनाएको छ।

यस पदका लागि उम्मेदवारको उमेर ३५ वर्ष पूरा भई ६५ वर्ष ननाघेको हुनुपर्ने व्यवस्था गरिएको छ। आगामी चार वर्षे कार्यकालका लागि निगमको नेतृत्व गर्ने उम्मेदवारले विस्तृत कार्ययोजना प्रस्तुत गर्नुपर्नेछ।

उम्मेदवारले कार्ययोजनामा समेट्नुपर्ने विषयहरू

मन्त्रालयले माग गरेको कार्ययोजनामा निगमका समग्र पक्षलाई समेट्नुपर्नेछ। जसमा मुख्य रूपमा निम्न विषयवस्तु समावेश गरिएको छ :

पेट्रोलियम पदार्थको आपूर्ति तथा बिक्री–वितरण व्यवस्थापन

मूल्य समायोजन तथा गुणस्तर नियन्त्रण

सम्पत्ति तथा जनशक्ति व्यवस्थापन

निजी क्षेत्रसँगको सहकार्य र साझेदारी

निगमको पूर्वाधार विकास र प्रविधिको उपयोग

सुशासन तथा संस्थागत सुधार का रणनीतिहरू

इथानोल लगायत वैकल्पिक ऊर्जा स्रोतको विकास र उपयोगबारे दूरगामी दृष्टिकोण

त्यसैगरी, उम्मेदवारले आफ्नो अल्पकालीन, मध्यकालीन र दीर्घकालीन सुधारका लागि स्पष्ट रणनीतिक योजना पनि प्रस्तुत गर्नुपर्नेछ।

एआईबाट बनेको कार्ययोजना स्वतः रद्द

मन्त्रालयले उम्मेदवारहरूलाई कृत्रिम बौद्धिकता (एआई) को प्रयोग गरी व्यवसायिक कार्ययोजना तयार नगर्न चेतावनी दिएको छ। यदि कुनै आवेदन एआईको सहायताले तयार भएको प्रमाणित भएमा सो आवेदन स्वतः रद्द गरिनेछ।

यस व्यवस्थामार्फत मन्त्रालयले उम्मेदवारको मौलिक सोच, नेतृत्व क्षमता र संस्थागत सुधारप्रतिको वास्तविक दृष्टिकोण मूल्यांकन गर्ने लक्ष्य राखेको अधिकारीहरूले बताएका छन्।

निगमको नेतृत्वप्रति अपेक्षा

देशको मुख्य पेट्रोलियम आपूर्तिकर्ता सरकारी निकाय भएकाले यसको कार्यकारी निर्देशकको छनोटलाई अत्यन्तै संवेदनशील र महत्त्वपूर्ण रूपमा हेरिएको छ। नयाँ कार्यकारी निर्देशकले निगमको वित्तीय अवस्था सुदृढ गर्नुका साथै आपूर्ति प्रणालीलाई अझ प्रभावकारी र पारदर्शी बनाउने अपेक्षा गरिएको छ।

मन्त्रालयले अब प्राप्त आवेदनहरूको गहन मूल्यांकन र छनोट प्रक्रिया पूरा गरी चाँडै नै नयाँ कार्यकारी निर्देशकको नियुक्ति गर्ने जनाएको छ।