सरकारले प्रदेश संरचना खारेज गर्न चाहे राप्रपाको साथ रहन्छ : ज्ञानबहादुर शाही

काठमाडौँ, वैशाख ७ गते । राष्ट्रिय प्रजातन्त्र पार्टी (राप्रपा) संसदीय दलका नेता ज्ञानबहादुर शाहीले प्रदेश संरचना खारेज गर्नका लागि आफ्नो पार्टीले सरकारलाई सहयोग गर्ने बताउनुभएको छ ।

सोमबार पार्टीद्वारा काठमाडौँमा आयोजित एक कार्यक्रममा बोल्दै उहाँले प्रदेश संरचना खारेज गर्नका लागि सरकारलाई दुई तिहाइ मत चाहिए आफ्नो पार्टीले साथ दिने बताउनुभएको हो । मुलुकमा हिन्दु राज्य स्थापना गर्न, राजासहितको प्रजातान्त्रिक शासन व्यवस्थाका लागि सरकार र सत्तारुढ राष्ट्रिय स्वतन्त्र पार्टीले सहयोग माग आफ्नो पार्टीले साथ दिने नेता शाहीको भनाइ थियो ।

उहाँले मुलुकलाई सुशासनको बाटोमा अघि बढाउनका लागि आफ्नो पार्टीले सदैव पहल गर्ने प्रतिबद्धता समेत व्यक्त गर्नुभयो । उहाँले भन्नुभयो, “आज यो देशको प्रदेश संरचना खारेज गर्नुपर्छ भन्नेकुरा त हामीले संसद्‌मा उभिएर नै भनिसक्यौँ । तपाईँहरूको १८२ सिट आएको छ । प्रदेश संरचना खारेज गर्नुहुन्छ । हिन्दु, बुद्ध, किराँतसहितको सनातन हिन्दु अधिराज्य स्थापना गर्नुहुन्छ । राजासहितको प्रजातन्त्रलाई अवलम्बन गर्नुहुन्छ । नेपालको संविधान संशोधन गर्न तपाईँलाई सिट पुगेन भने ५ वटा सिट हामी दिन्छौँ । १८७ सिट पुग्छ, संविधान संशोधन गरौँ भनेर हामीले घोषणा गरिसकेका छौं । यो हाम्रो शक्ति हो । यो एजेन्डा हो, यो मरेर मर्दैन । हामीले सुशासनको पक्षमा हिजो पनि लडेका थियौं, आज र भोलि पनि लडिरहनु पर्छ, लड्छौँ पनि ।”

सो अवसरमा पार्टीका प्रवक्ता समेत रहनुभएका नेता शाहीले फरक मत राखेर सबै नेता, कार्यकर्तालाई पनि समेटेर अघि बढ्न पार्टी नेतृत्वको पनि ध्यानाकर्षण गराउनुभयो ।