11/21/2026, 21:18:17
शनिबार, मङि्सर ०६, २०८३

जेन-जी आन्दोलनमा हामीलाई जेन-जीले नै बचाए, ५० वर्ष माथिकाले हाने : शेरबहादुर देउवा

गण्डकी प्रदेश अधिवेशनमा देउवाको दाबी— आक्रमणमा ठूलो षड्यन्त्र, सनाखत बिनाको विशेष महाधिवेशन वैधानिक होइन

FILE PHOTO - SETOPRESS.COM
©FILE PHOTO - SETOPRESS.COM

कास्की, मङ्सिर ५ गते । नेपाली कांग्रेसका पूर्व-सभापति शेरबहादुर देउवाले गत वर्ष भदौ २४ को जेन-जी आन्दोलनमा आफू र पत्नी डा. आरजु राणा देउवालाई जेन-जीहरूले नै बचाएको बताउनुभएको छ ।

देउवा समूहको दोस्रो गण्डकी प्रदेश अधिवेशनलाई सम्बोधन गर्दै उहाँले जेन-जीको नाममा ५० वर्षमाथिका केहीले आक्रमण गरी मार्न खोजे पनि जेन-जीहरूले नै जोगाएको र अझै घाउ बाँकी रहेको उल्लेख गर्नुभयो ।

आफूहरूमाथि आक्रमण हुनुमा ठूलो षड्यन्त्र रहेको दाबी गर्दै पूर्व-प्रधानमन्त्री देउवाले तत्कालीन समयमा ओली प्रधानमन्त्री, आरजु मन्त्री र रमेश लेखक गृहमन्त्री हुँदाहुँदै पनि किन आक्रमण गरियो भन्दै प्रश्न उठाउनुभयो । मान्छेलाई कसैले मार्न खोज्दैमा नमर्ने र काल आएमा मात्र मर्ने उहाँको भनाइ थियो ।

विशेष महाधिवेशन पक्षधरले आफूलाई मार्न खोज्नेलाई नै टिकट दिएको आरोप लगाउँदै देउवाले षड्यन्त्रपूर्वक कांग्रेस कब्जा गरिएको जिकिर गर्नुभयो । सनाखत बिना सदस्य यकिन गरी भएको महाधिवेशन वैधानिक नहुने स्पष्ट पार्दै उहाँले कांग्रेसबाट पाँच पटक प्रधानमन्त्री भइसकेकाले अब लिनु केही नभई दिनु मात्र बाँकी रहेको बताउनुभयो ।

गण्डकी प्रदेश सभापति मेखलाल श्रेष्ठको अध्यक्षतामा भएको उक्त अधिवेशनमा नेताहरू शशाङ्क कोइराला, विमलेन्द्र निधि, शङ्कर भण्डारी, एनपी साउद, कृष्णप्रसाद सिटौला, केदार कार्की र मोहन बस्नेत लगायतले धारणा राख्नुभएको थियो ।

विषय / बुँदा मुख्य भनाइ वा दाबी
आक्रमण र बचाउ भदौ २४ को आन्दोलनमा ५० वर्षमाथिका केहीले हानेको तर जेनजीहरूले जोगाएको देउवाको भनाइ ।
षड्यन्त्रको दाबी आक्रमणमा ठूलो षड्यन्त्र रहेको आरोप; कसैले मार्न खोज्दैमा नमर्ने र काल आएपछि मात्र मर्ने टिप्पणी ।
महाधिवेशन र टिकट सनाखत बिना सदस्य यकिन गरी गरिएको महाधिवेशन अवैधानिक रहेको र मार्न खोज्नेलाई नै टिकट दिई पार्टी कब्जा गरिएको जिकिर ।
पार्टी नेतृत्व र उपस्थिति पाँच पटक प्रधानमन्त्री भइसकेकाले अब लिनु केही नभएको भनाइ; गण्डकी अधिवेशनमा शीर्ष नेताहरूको सहभागिता ।