मुक्त कमैयाका समस्या समाधान गर्न प्रदेश सरकार गम्भीर: मुख्यमन्त्री खगराज भट्ट

धनगढी, असोज ६ गते । सुदूरपश्चिम प्रदेशका मुक्त कमैयाका प्रतिनिधिमण्डलले आफ्ना दीर्घकालीन समस्याहरू समाधान गर्न प्रदेश सरकारसँग जोडदार माग गरेका छन्। गाँस, बाँस तथा पुनःस्थापनाका विविध समस्याहरू लिएर मुख्यमन्त्री निवास पुगेका प्रतिनिधिहरूले मुक्त कमैयाका मुद्दामा सरकारलाई गम्भीर बन्न आग्रह गरेका हुन्।

मुक्त कमैयाका प्रतिनिधिहरूसँगको छलफलमा सुदूरपश्चिम प्रदेशका मुख्यमन्त्री खगराज भट्टले उनीहरूको आवास तथा जीविकोपार्जनसँग जोडिएका समस्या समाधान गर्न प्रदेश सरकार पूर्ण रूपमा गम्भीर रहेको बताउनुभयो। उहाँले लामो समयदेखि ओझेलमा परेका मुक्त कमैयाको समस्या समाधानका लागि प्रदेश सरकारले ठोस पहल गर्ने प्रतिबद्धता व्यक्त गर्नुभयो।

मुख्यमन्त्री भट्टले मुक्त कमैयाको सुरक्षित आवास र जीवनस्तर सुधारका लागि आगामी बजेटमै आवश्यक बजेट तथा कार्यक्रमको व्यवस्था गरिने स्पष्ट पार्नुभयो। भूमिहीन तथा सीमान्तकृत वर्गको पुनःस्थापना र जीवनस्तर वृद्धि गर्ने विषयलाई प्रदेश सरकारले आफ्नो प्राथमिकताको सूचीमा राखेको उहाँको भनाइ थियो।

सो छलफल कार्यक्रममा भूमि व्यवस्था, कृषि तथा सहकारीमन्त्री दमनबहादुर भण्डारी, भौतिक पूर्वाधार राज्यमन्त्री जानकीदेवी कुँवर, कृषि मन्त्रालयका पदाधिकारीहरूका साथै नापी कार्यालय र मालपोत कार्यालय कैलालीका प्रमुखहरू लगायतका सरोकारवालाहरूको उपस्थिति रहेको थियो।