नेपाल टेलिकमको नयाँ ब्रान्ड एम्बेसडरमा अभिनेत्री नीति शाह नियुक्त

काठमाडौँ, भदौ २७ गते । नेपाल टेलिकमले प्रसिद्ध अभिनेत्री तथा मोडल नीति शाहलाई आफ्नो नयाँ ब्रान्ड एम्बेसडरका रूपमा नियुक्त गरेको छ।

टेलिकमकी प्रबन्ध निर्देशक सङ्गीता पहाडी र अभिनेत्री शाहबिच सम्झौतापत्रमा हस्ताक्षर भएको हो। ब्रान्ड एम्बेसडर बनेसँगै अभिनेत्री शाहले कम्पनीले प्रवाह गर्ने सेवा, सुविधा तथा विविध ब्रान्ड प्रवर्धनसम्बन्धी गतिविधिहरूमा सक्रिय भूमिका निर्वाह गर्नुहुनेछ।

सम्झौता कार्यक्रममा नेपाल टेलिकमकी प्रबन्ध निर्देशक सङ्गीता पहाडीले मनोरञ्जन र खेलकुद क्षेत्रका स्थापित व्यक्तित्वहरूको आबद्धताले विशेष गरी युवापुस्ताका साथै सम्पूर्ण सर्वसाधारणसँग टेलिकमको सम्बन्ध अझ सुदृढ, प्रगाढ र नजिक बनाउन सहयोग पुग्ने विश्वास व्यक्त गर्नुभयो।

ब्रान्ड एम्बेसडरमा नियुक्त भएपछि खुसी व्यक्त गर्दै अभिनेत्री नीति शाहले देशकै ठुलो र पूर्ण स्वदेशी लगानी रहेको दूरसञ्चार संस्था नेपाल टेलिकमसँग जोडिन पाउँदा आफू अत्यन्तै गौरवान्वित र उत्साहित भएको बताउनुभयो।