फिफा विश्वकप २०२६ अन्तर्गत अन्तिम १६ (Round of 16) का खेलहरूमा स्पेन, पोर्चुगल र स्विट्जरल्याण्डले प्रभावशाली प्रदर्शन गर्दै क्वार्टरफाइनलमा स्थान बनाएका छन्। तीनवटै खेलमा स्टार खेलाडीहरूले उत्कृष्ट प्रदर्शन गर्दै आफ्ना टोलीलाई जित दिलाए।
पहिलो खेलमा स्पेनले अस्ट्रियालाई ३–० ले पराजित गर्दै सहज जित निकाल्यो। स्पेनको जितमा मिकेल ओयार्जाबालले ३६औँ र ८९औँ मिनेटमा दुई गोल गरे भने पेड्रो पोरोले ६६औँ मिनेटमा एक गोल थपे। स्पेनले खेलभर बल नियन्त्रण गर्दै अस्ट्रियालाई दबाबमा राखेको थियो।
त्यसैगरी, पोर्चुगलले क्रोएसियालाई २–१ ले हराउँदै अन्तिम आठमा स्थान सुरक्षित गर्यो। खेलको ५३औँ मिनेटमा इभान पेरिसिचले गोल गर्दै क्रोएसियालाई अग्रता दिलाएका थिए। तर ६८औँ मिनेटमा कप्तान क्रिस्टियानो रोनाल्डोले पेनाल्टीमार्फत बराबरी गोल फर्काए। खेल अतिरिक्त समयमा पुग्ने क्रममा ९०+४औँ मिनेटमा गोन्सालो रामोसले निर्णायक गोल गर्दै पोर्चुगललाई रोमाञ्चक जित दिलाए।
अर्को खेलमा स्विट्जरल्याण्डले अल्जेरियालाई २–० ले पराजित गर्यो। ब्रिल एम्बोलोले १०औँ मिनेटमै गोल गर्दै टोलीलाई अग्रता दिलाएका थिए भने दोस्रो हाफ सुरु भएको एक मिनेटमै डान न्डोएले अर्को गोल थप्दै स्विट्जरल्याण्डको जित सुनिश्चित गरे।
अब विश्वकप अन्तर्गत अन्तिम १६ का बाँकी खेलहरूमा आज अष्ट्रेलिया र इजिप्ट, अर्जेन्टिना र केप भर्डे, तथा कोलम्बिया र घाना बीच प्रतिस्पर्धा हुनेछ। यी खेलहरूबाट क्वार्टरफाइनल पुग्ने बाँकी तीन टोलीको टुंगो लाग्नेछ।
विश्वकप २०२६ मा अब उपाधि होड झन् रोमाञ्चक बन्दै गएको छ। विश्व फुटबलका शक्तिशाली टोलीहरूबीचको प्रतिस्पर्धाले समर्थकहरूको उत्साह थप बढाएको छ।
What if you could work from Anywhere?
Explore More with something that can change your Life!
