युरोपमा विद्युतीय सवारी साधनको चार्जिङ खर्च डिजेलभन्दा आधा कम: वातावरण संरक्षण संस्थाको अध्ययन

काठमाडौँ, असोज १४ गते । युरोपमा विद्युतीय सवारी साधन (EV) चार्ज गर्न लाग्ने खर्च डिजेल गाडीमा इन्धन भर्न लाग्ने खर्चको तुलनामा औसतमा आधाभन्दा कम रहेको एक अध्ययनले देखाएको छ।

ब्रसेल्सस्थित वातावरण संरक्षण सम्बन्धी संस्था ‘ट्रान्सपोर्ट एन्ड इन्भाइरोन्मेन्ट‘ (Transport & Environment) ले सार्वजनिक गरेको विश्लेषणमा विद्युतीय सवारी साधनको प्रयोगलाई थप गति दिन आवश्यक रहेको उल्लेख गरिएको छ।

अध्ययनअनुसार युरोपमा यस वर्षको सुरुआतको तुलनामा अहिले ५० लिटर डिजेल भर्न करिब ३२ युरो बढी खर्च भइरहेको छ; जसमध्ये १६ युरो बराबरको वृद्धि प्रशोधन नाफा (Refining Margin) सँग सम्बन्धित छ। युरोपेली केन्द्रीय बैंकका अनुसार डिजेलको प्रतिलिटर प्रशोधन नाफा फेब्रुअरीमा ०.१० युरो रहेकोमा सेप्टेम्बर मध्यसम्म बढेर ०.४१ युरो पुगेको थियो।

अनुसन्धानमा १०० किलोमिटर दूरी पार गर्न डिजेल गाडीले औसत ६.९ लिटर इन्धन र विद्युतीय गाडीले २०.२ किलोवाट घण्टा विद्युत (०.३४३ युरो/किलोवाट घण्टाका दरले) खपत गर्ने आधार मानिएको छ। साथै, युरोपेली संघका नौ प्रमुख बजारमध्ये छ वटामा ब्याट्रीबाट चल्ने विद्युतीय भारी ट्रकको कुल स्वामित्व खर्च (Total Cost of Ownership) समेत डिजेल ट्रकको तुलनामा कम रहेको पाइएको छ।

संस्थाका वरिष्ठ निर्देशक एन्टोनी फ्रोगाटले पेट्रोलियम पदार्थमाथिको निर्भरता घटाउन दीर्घकालीन रूपमा विद्युतीय सवारी साधनको विस्तार आवश्यक रहेको बताउनुभयो। संस्थाले ऊर्जा कम्पनीहरूबाट अतिरिक्त कर उठाई सार्वजनिक यातायातको विकास र पुराना सवारी साधन विस्थापनमा प्रयोग गर्न तथा न्यून आय भएका परिवारलाई लक्षित गरी सहयोग उपलब्ध गराउन युरोपेली आयोगलाई सुझाव दिएको छ।