इरानद्वारा अमेरिकासमक्ष ७ दिनभित्र होर्मुज जलडमरूमध्य खोल्ने योजना प्रस्तुत: सर्त पूरा भए वार्ता हुने

काठमाडौँ, असोज १० गते । इरानले आवश्यक सर्तहरू पूरा भए सात दिनभित्र रणनीतिक रूपमा महत्त्वपूर्ण मानिने होर्मुज जलडमरूमध्य (Strait of Hormuz) पुनः खोल्न सकिने योजना अमेरिकासमक्ष प्रस्तुत गरेको जनाएको छ।

इरानका विदेशमन्त्री सैयद अब्बास अराघ्चीले शुक्रबार न्युयोर्कस्थित संयुक्त राष्ट्रसङ्घको मुख्यालयमा सञ्चारकर्मीहरूसँग कुरा गर्दै कतारको मध्यस्थतामा अमेरिकालाई उक्त ठोस प्रस्ताव पठाइएको जानकारी दिनुभयो।

विदेशमन्त्री अराघ्चीका अनुसार अमेरिकाले प्रस्ताव स्वीकार गरेपछि सात दिनको समयसीमा औपचारिक रूपमा सुरु हुनेछ। योजनाअनुसार अमेरिकाले पहिलो ४ देखि ५ दिनभित्र केही आवश्यक कदमहरू चाल्नुपर्नेछ। त्यसपछि छैटौँ दिनमा जलडमरूमध्य खोलिनेछ भने सातौँ दिनमा अमेरिका र इरानबिच अन्तिम सम्झौताका लागि द्विपक्षीय वार्ता सुरु हुनेछ।

अमेरिकी पक्षले चाल्नुपर्ने कदमहरू नयाँ नभई गत जुन १८ मा दुवै देशका राष्ट्रप्रमुखहरूले लेबनानसहित क्षेत्रका सबै मोर्चामा जारी युद्ध अन्त्य गर्ने विषयमा हस्ताक्षर गरेको समझदारीपत्रमै समावेश गरिएका विषयहरू भएको इरानले स्पष्ट पारेको छ। इरानले अमेरिका सम्झौता गर्न र जलडमरूमध्य खोल्न गम्भीर भए सम्पूर्ण तयारी पूरा भइसकेको बताएको छ।

विदेशमन्त्री अराघ्चीले इरानले कुनै पनि प्रकारको दबाब, धम्की वा डर स्वीकार नगर्ने र दबाबका सामु आफ्नो सार्वभौम अधिकारमा सम्झौता नगर्ने स्पष्ट पार्नुभयो। जुनमा भएको समझदारी अनुसार ६० दिनभित्र अन्तिम सम्झौताका लागि वार्ता गर्ने तय गरिए पनि पछिल्लो समय दुवै देशबिच तनाव बढेकाले वार्ताको भविष्य अझै स्पष्ट हुन सकेको छैन।