नेतान्याहुको आरोपमा कतारको कडा आपत्ति: ‘कब्जा गरिएको प्यालेस्टाइनमा भएका कार्यबाट ध्यान मोड्ने प्रयास’

दोहा, असोज ९ गते । कतारले इजरायली प्रधानमन्त्री बेन्जामिन नेतान्याहुले संयुक्त राष्ट्रसङ्घको ८१औँ महासभा (UNGA81) मा कतारविरुद्ध लगाउनुभएको गम्भीर आरोपहरूलाई पूर्ण रूपमा अस्वीकार गरेको छ।

कतारको विदेश मन्त्रालयका प्रवक्ता माजेद अल-अन्सारीले सामाजिक सञ्जाल एक्स (X) मार्फत प्रतिक्रिया दिँदै नेतान्याहुको बयान निराधार रहेको र यसले कब्जा गरिएका प्यालेस्टिनी भूभागमा इजरायलका कार्यबाट विश्वको ध्यान मोड्ने प्रयास गरेको बताउनुभएको छ।

प्रधानमन्त्री नेतान्याहुले राष्ट्रसङ्घको मञ्चबाट कतार र टर्कीले इजरायलविरुद्ध ‘झूट’ फैलाउन र पश्चिमा देशहरूप्रति युवाहरूमा घृणा जगाउन ठूलो धनराशी खर्च गरेर ‘प्रभाव अभियान’ चलाएको आरोप लगाउनुभएको थियो। उहाँले कतारले हमासका नेताहरूलाई आश्रय दिएको र टर्की यहुदी विरोधी झूट फैलाउने मुख्य माध्यम बनेको भन्दै टर्कीका राष्ट्रपति रेसेप तैयप एर्दोगानको समेत आलोचना गर्नुभएको थियो।

इजरायली आरोपको खण्डन गर्दै कतारी प्रवक्ता अल-अन्सारीले विश्वव्यापी जनमत र विशेष गरी युवाहरूमा आएको परिवर्तन कुनै प्रायोजित अभियानको नतिजा नभई प्यालेस्टाइनमा भइरहेको वास्तविक अवस्थाको प्रत्यक्ष अवलोकनको परिणाम भएको स्पष्ट पार्नुभयो। युवाहरूको चेतना र निर्णय क्षमतालाई ‘प्रभाव अभियान’ का रूपमा अर्थ्याउनु उनीहरूको विवेकको अपमान भएको कतारको ठम्याइ छ।

कतारले विश्व समुदायमा आफ्नो छवि सुधार्न इजरायली नेताहरूलाई धम्की र बयानबाजी छोडेर आफ्नो नीति परिवर्तन गर्न, अन्तर्राष्ट्रिय कानुनको सम्मान गर्न र आफ्ना कार्यहरूको जिम्मेवारी लिन आग्रह गरेको छ। मध्यपूर्वी तनावका बिच राष्ट्रसङ्घीय महासभामा भएको यो वाक्युद्धले कतार र इजरायलबिचको कूटनीतिक दूरी थप बढेको देखाउँछ।