रुसले युक्रेनविरुद्ध ४७ देशका नागरिकलाई लडाकूका रूपमा प्रयोग गरिरहेको जेलेन्स्कीको दाबी

काठमाडौँ, असोज ८ गते । युक्रेनका राष्ट्रपति भोलोदिमर जेलेन्स्कीले संयुक्त राष्ट्रसङ्घको महासभालाई सम्बोधन गर्दै रुसले युक्रेनविरुद्धको युद्धमा ४७ देशका नागरिकहरूलाई लडाकूका रूपमा प्रयोग गरिरहेको दाबी गर्नुभएको छ। सम्बोधनका क्रममा उहाँले घाना, नेपाल र भारत लगायतका देशका नागरिकहरू रुसी पक्षबाट युद्धमा संलग्न रहेको जानकारी दिनुभयो।

जेलेन्स्कीका अनुसार सन् २०२५ मा रुसको कुर्स्क क्षेत्रबाट पक्राउ परेका दुई उत्तर कोरियाली सैनिकलाई युक्रेनले हालै दक्षिण कोरिया पठाएको छ। दक्षिण कोरियाली गुप्तचर निकायका अनुसार उत्तर कोरियाले सन् २०२४ को अक्टोबरदेखि रुसमा करिब १५ हजार सैनिक पठाएको छ, जसमध्ये करिब दुई हजार सैनिकको मृत्यु भइसकेको अनुमान छ।

उहाँले फिनल्यान्ड, अस्ट्रेलिया र क्यानाडा जस्ता साझेदार मुलुकहरूसँग ड्रोन तथा सुरक्षा सहकार्य विस्तार भइरहेको बताउनुभयो। साथै, आगामी हिउँदमा रुसले युक्रेनी नागरिकका ताप तथा ऊर्जा पूर्वाधारमा गर्ने आक्रमणको जवाफ स्वरूप युक्रेनले पनि रुसी ऊर्जा पूर्वाधारलाई लक्षित गर्न सक्ने चेतावनी दिनुभयो।

जेलेन्स्कीले युक्रेनको उद्देश्य रुसको पेट्रोल तथा डिजेल आपूर्ति नष्ट गर्नु नभई युद्ध सञ्चालनका लागि आवश्यक आम्दानीको मुख्य स्रोतमा असर पार्नु रहेको स्पष्ट पार्नुभयो। रुससँगको व्यापारबाट हुने आम्दानीले युद्ध थप लम्बिने भएकाले अन्तर्राष्ट्रिय समुदायलाई रुससँगको व्यापार सीमित गर्न उहाँले आग्रह गर्नुभयो।