संविधानका उपलब्धि संस्थागत गर्दै राष्ट्र निर्माणमा जुट्न एकजुट हुऔँ: मुख्यमन्त्री खगराज भट्ट

धनगढी, असोज ३ गते । सुदूरपश्चिम प्रदेशका मुख्यमन्त्री खगराज भट्टले संविधान दिवसका अवसरमा आयोजित विशेष कार्यक्रमलाई सम्बोधन गर्दै संविधानका उपलब्धिहरूलाई संस्थागत गर्दै राष्ट्र निर्माणको दिशामा अघि बढ्न सबै पक्ष एकताबद्ध हुनुपर्नेमा जोड दिनुभएको छ।

जनताको लामो सङ्घर्ष, त्याग र बलिदानबाट प्राप्त संविधानले लोकतन्त्र, गणतन्त्र, सङ्घीयता, सामाजिक न्याय र समावेशिताका मूल्य-मान्यतालाई संस्थागत गरेको उहाँको भनाइ छ।

कार्यक्रममा आन्तरिक मामिला तथा कानुनमन्त्री खुसीराम डगौरा थारुले संविधान केवल कानुनको सङ्ग्रह मात्र नभई नेपाली समाजको विविधतालाई जोड्ने एकताको प्रतीक भएको बताउनुभयो। पूर्वमुख्यमन्त्री राजेन्द्रसिंह रावलले संविधानको रक्षा र पालना गर्नु सबै नागरिक र राजनीतिक दलहरूको साझा दायित्व भएको उल्लेख गर्नुभयो।

सुदूरपश्चिम प्रदेश सरकारद्वारा आयोजित समारोहमा प्रदेश प्रमुख नजिर मियाँ, सभामुख भीमबहादुर भण्डारी, उपसभामुख कोइलीदेवी चौधरी, प्रदेशका मन्त्रीहरू, प्रदेशसभा सदस्यहरू तथा सुरक्षा निकायका प्रमुख लगायतको उपस्थिति रहेको थियो।

सुदूरपश्चिम प्रदेश संविधान दिवस समारोहको मुख्य विवरण