विश्वकप फाइनलमा ट्रम्पको विशेष उपस्थिति: ट्रफी वितरण गर्ने, सुरक्षा व्यवस्था कडा

बेडमिन्स्टर, साउन ३ गते । संयुक्त राज्य अमेरिकाका राष्ट्रपति डोनाल्ड ट्रम्प आइतबार न्यु जर्सीमा हुने फिफा विश्वकप फुटबलको फाइनल खेलमा विशेष उपस्थितिका रूपमा सहभागी हुनुहुने भएको छ । स्पेन र अर्जेन्टिनाबिच हुने उपाधि भिडन्तपछि उहाँले फिफा अध्यक्ष जियानी इन्फान्टिनोसँग मिलेर विजेता टोलीलाई ट्रफी प्रदान गर्ने कार्यक्रम छ ।

अमेरिकी स्ट्राइकर फोलारिन बालोगुनको रातो कार्ड फिर्ता लिन ट्रम्पले फिफा अध्यक्षलाई फोन गरेको विषयले विवाद निम्त्याए पनि उहाँले यसलाई अमेरिकामा फुटबलको लोकप्रियता बढाउने सफल प्रतियोगिता भन्नुभएको छ । फाइनल खेलमा प्रथम महिला मेलानिया ट्रम्प, ब्यारन ट्रम्प र भिक्टर नाभ्स पनि उपस्थित रहनेछन् ।

कूटनीतिक भेटघाट र कडा सुरक्षा

विश्वकप फाइनलमा खेलकुदसँगै कूटनीतिक भेटघाट पनि हुने भएको छ । खेल हेर्न स्पेनका प्रधानमन्त्री पेड्रो सान्चेज, मेक्सिकोकी राष्ट्रपति क्लाउडिया शिनबाम र क्यानडाका प्रधानमन्त्री मार्क कार्नी सहभागी हुनेछन् । नेताहरूबीचको मतभेद र उपस्थितिलाई ध्यानमा राख्दै रङ्गशाला वरपर कडा सुरक्षा व्यवस्था मिलाइएको छ भने हवाई क्षेत्रलाई अस्थायी रूपमा ‘नो-फ्लाइ जोन’ घोषणा गरिएको छ ।

ट्रफी विवाद

दोस्रो कार्यकाल सम्हालेयता ट्रम्पको फिफा अध्यक्षसँगको सम्बन्ध थप प्रगाढ बनेको छ । यसअघि फिफा क्लब विश्वकपको सक्कली ट्रफी ह्वाइट हाउसमा राखेको ट्रम्पको दाबीलाई खण्डन गर्दै फिफाले उक्त ट्रफी सक्कली नभई प्रतिकृति (रेप्लिका) मात्र भएको स्पष्ट पारेको थियो ।