फिफा विश्वकप २०२६ : बेल्जियमलाई हराउँदै स्पेन सेमिफाइनलमा

लस एन्जलस, असार २७ गते । मिकेल मेरिनोले दोस्रो हाफको अन्त्यतिर गरेको गोल मद्दतले स्पेन फिफा विश्वकप फुटबल २०२६ को सेमिफाइनलमा प्रवेश गरेको छ । शनिबार भएको रोमाञ्चक क्वाटरफाइनल खेलमा बेल्जियमलाई २–१ ले पराजित गर्दै स्पेनले अन्तिम चारमा आफ्नो स्थान सुरक्षित गरेको हो । अब सेमिफाइनलमा स्पेनको भेट फ्रान्ससँग हुनेछ ।

लस एन्जलसमा भएको प्रतिस्पर्धात्मक खेलको ३० औं मिनेटमा फाबिन रुइजको गोलबाट स्पेनले सुरुवाती अग्रता लिएको थियो । तर, पहिलो हाफको खेल सकिन लाग्दा ४१ औं मिनेटमा चाल्सै डे केटेलेरले बेल्जियमका लागि बराबरी गोल फर्काए । जारी प्रतियोगितामा स्पेनले खाएको यो नै पहिलो गोल हो ।

निर्धारित समयको खेल १–१ को बराबरीमा टुंगिन लागेका बेला ८८ औं मिनेटमा स्पेनले निर्णायक गोल गर्‍यो । बेल्जियमका गोलरक्षक सेने लामेन्सको गम्भीर गल्तीको फाइदा उठाउँदै मेरिनोले गोल गरे, जुन स्पेनको जितका लागि पर्याप्त बन्यो ।

यस हारसँगै बेल्जियमको विश्वकप यात्रा क्वाटरफाइनलमै टुंगिएको छ भने स्पेन उपाधि नजिक पुगेको छ ।