मेसीको जादुमय ह्याट्रिक: अर्जेन्टिनाद्वारा अल्जेरिया ३–० ले पराजित, क्लोजको कीर्तिमानसमेत बराबरी

न्युयोर्क, असार ४ गते । लियोनेल मेसीले कीर्तिमान आफ्नो छैटौँ विश्वकपको सुरुवात ह्याट्रिकसहित गर्नुभएको छ । मेसीले बुधबार अल्जेरियाविरुद्धको खेलमा तीन गोल गरेर विश्वकपका सर्वाधिक गोलकर्ता मिरोस्लाभ क्लोजको बराबरी गर्नुभएको हो । यी दुवै खेलाडीले विश्वकपमा कुल १६–१६ गोल गर्नुभएको छ ।

मेसीको ह्याट्रिकमा उपाधि रक्षा अभियानमा रहेको अर्जेन्टिनाले अल्जेरियालाई ३–० ले हराएर विजयी सुरुवात गर्‍यो । अमेरिकाको कान्सास सिटीमा रहेको एरोहेड रङ्गशालामा उपस्थित ६९,०४५ दर्शक सामु ३८ वर्षीय मेसीले आफ्नो २०० औँ अन्तर्राष्ट्रिय खेललाई विशेष बनाउनुभयो । समूह ‘जे’ अन्तर्गत भएको खेलमा अल्जेरियाविरुद्ध खेल्दै मेसी छ विश्वकप खेल्ने पहिलो खेलाडी पनि बन्नुभयो ।

किशोर उमेरदेखि छैटौँ विश्वकपको यात्रा

सन् २००६ मा किशोर उमेरमा हुँदा मेसीले जर्मनीमा पहिलो विश्वकप खेल्नुभएको थियो । १८ वर्षको उमेरमा मेसीले सर्बिया मोन्टेनेग्रोबिच खेलेर विश्वकपमा पदार्पण गर्नुभएको हो । उहाँले सो खेलमा गोल पनि गर्नुभयो ।

मेसी सन् २०१० मा भएको विश्वकपमा भने गोलविहीन हुनुभयो तर त्यसपछि उहाँले:

• सन् २०१४ को संस्करण: ४ गोल
• सन् २०१८ को संस्करण: १ गोल
• पछिल्लो संस्करण (कतार): ७ गोल

२० वर्षपछि मेसीले विश्वकपको सबभन्दा ठुलो फुटबल मञ्चमा पहिलो ह्याट्रिक गर्नुभएको छ, जुन यस विश्वकपको पहिलो ह्याट्रिक पनि भएको छ । मेसीको खेल जीवनको भने यो ६१ औँ ह्याट्रिक हो । अर्जेन्टिनाको जर्सीमा मात्र उहाँले ११ ह्याट्रिक गर्नुभएको छ ।

खेलको रोमाञ्चक मोड र कीर्तिमान

खेलको १७ औँ मिनेटमा डिबक्सबाहिरबाट घुमाउरो प्रहारमार्फत मेसीले विश्वकपमा आफ्नो १४ औँ गोल गरी गर्ड मुलर र किलियन एम्बापेको बराबरी गर्नुभएको थियो । खेलको ६0 औँ मिनेटमा रिबाउन्डमा अर्को गोल गरेर मेसीले ब्राजिलका रोनाल्डोले विश्वकपमा गरेको १५ गोलको कोसेढुङ्गा छुनुभयो । एलेक्सिस म्याक एलिस्टरको प्रहारलाई अल्जेरियाका गोलरक्षक लुका जिदानले राम्रोसँग क्लियर गर्न नसकेपछि फर्केर आएको बललाई मेसीले गोलपोस्टमा छिराउनुभएको हो ।

त्यसपछि ७६ औँ मिनेटमा मेसीले डिबक्सको लाइनबाट सटिक प्रहारमार्फत ह्याट्रिकको गौरव हासिल गरी क्लोजको समकक्षमा पुग्नुभयो । मेसी अब यस विश्वकपमै सर्वाधिक गोलकर्ता बन्ने सम्भावना प्रबल भएको छ । चार वर्षअघि कतारमा भएको विश्वकपको फाइनलमा फ्रान्सलाई टाइब्रेकरमा हराएर अर्जेन्टिना च्याम्पियन बन्दा मेसीले दुई गोल गर्नुभएको थियो ।

“गोलपछि मेरो आँखामा आँसु थियो” – मेसी

यस विश्वकपअघि मेसीको फर्मलाई लिएर सबै चिन्तामा थिए । अझ विश्वकपअघि मांसपेशीमा खिचावको चोट बेहोरेपछि मात्र होइन, ढल्किँदो उमेरका कारण पनि यस विश्वकपमा मेसीले पहिले जस्तो खेल देखाउँछ भन्नेमा धेरै विश्वस्त थिएनन् । यी सबैलाई जवाफ दिँदै मेसीले अल्जेरियाविरुद्धको खेलमा एकल प्रदर्शन नै देखाउनुभयो ।

“पहिलो गोलपछि मेरो आँखामा आँसु थियो किनभने यसअघि म केही कठिन समयबाट गुज्रिरहेको थिएँ । यद्यपि यो फुटबलसँग सम्बन्धित छैन । त्यसैले गोलपछि म भावुक बनेँ । मलाई सहयोग गरेकोमा म मेरा साथी, खेलाडी, कोचिङ स्टाफ र सम्पूर्ण टिमलाई धन्यवाद दिन चाहन्छु । यो मेरो छैटौँ विश्वकप हो । मलाई लाग्छ म अहिले पनि उत्कृष्ट फुटबल खेल्न सक्छु । म भाग्यमानी पनि छु, मेरो प्रदर्शन राम्रो भइरहेको छ र आज मैले आफ्नो देशलाई एउटा कठिन जित दिलाउन सफल भएँ ।” – लियोनेल मेसी

विश्वकपका सर्वाधिक गोलकर्ताहरूको सूची