नाबालिकालाई जबरजस्ती करणी गरेको आरोपमा ३० वर्षीय युवक पक्राउ

स्याङ्जा, असोज १९ गते । स्याङ्जामा नाबालिकालाई ललाई-फकाई जबरजस्ती करणी गरेको आरोपमा प्रहरीले एक युवकलाई पक्राउ गरेको छ। पक्राउ पर्नेमा जिल्लाको अर्जुनचौपारी गाउँपालिका–२, खाल्टे बस्ने ३० वर्षीय सुरज भन्ने सुरोज नेपाली रहेका छन्।

परिवर्तित नाम ‘०८३/०८४ भीरकोट–आर’ भएकी नाबालिकालाई ललाई-फकाई जबरजस्ती करणी गरेको भन्दै प्रहरीमा जाहेरी परेको थियो। जाहेरी परेलगत्तै जिल्ला प्रहरी कार्यालय स्याङ्जाबाट खटिएको टोलीले अभियुक्त नेपालीलाई नियन्त्रणमा लिएको हो।

जिल्ला प्रहरी कार्यालय स्याङ्जाका प्रहरी नायब उपरीक्षक (डिएसपी) रमेशदत्त अवस्थीका अनुसार पक्राउ परेका नेपालीविरुद्ध जबरजस्ती करणीसम्बन्धी कसुरमा मुद्दा दर्ता गरी कानुनी कारबाही तथा अनुसन्धान अघि बढाइएको छ।

घटनाको गम्भीरतालाई ध्यानमा राख्दै थप अनुसन्धान कार्य भइरहेको र अनुसन्धान पूरा भएपछि घटनासँग सम्बन्धित थप तथ्यहरू सार्वजनिक गरिने प्रहरी नायब उपरीक्षक अवस्थीले जानकारी दिनुभयो।