कर्णालीमा पहिलोपटक इन्धन भण्डारणगृह बन्दै: सुर्खेतमा ४२० किलोलिटर क्षमताको डिपो निर्माण सुरु

काठमाडौँ, असोज १८ गते । नेपाल आयल निगमले कर्णाली प्रदेशमा इन्धन आपूर्ति सहज बनाउन सुर्खेतमा ४२० किलोलिटर (४ लाख २० हजार लिटर) क्षमताको इन्धन भण्डारणगृह निर्माण सुरु गरेको छ।

देशका अन्य सबै प्रदेशमा इन्धन भण्डारण डिपो भए पनि कर्णालीमा नहुँदा हालसम्म भारतबाट आएको इन्धन नेपालगन्ज डिपोमा राखेर ट्याङ्करमार्फत कर्णाली पठाउनुपर्ने बाध्यता रहँदै आएको थियो।

सुर्खेतमा निर्माणाधीन डिपोमा डिजेलका लागि २८० किलोलिटर (७०-७० किलोलिटरका ४ वटा भूमिगत ट्याङ्की) र पेट्रोलका लागि १४० किलोलिटर (७०-७० किलोलिटरका २ वटा भूमिगत ट्याङ्की) भण्डारण क्षमता रहने निगमले जनाएको छ।

नयाँ डिपो सञ्चालनमा आएपछि कर्णालीमा नेपालगन्जको भर पर्नुपर्ने अवस्थाको अन्त्य भई कम्तीमा एक साताको माग धान्ने क्षमता कायम हुने निगमका प्रवक्ता मनोजकुमार ठाकुरले जानकारी दिनुभयो।

करिब ११ करोड रुपियाँको लागतमा निर्माण भइरहेको यो भण्डारणगृहको हालसम्म ३५ प्रतिशत काम सम्पन्न भइसकेको छ। घेराबार (कम्पाउन्ड वाल) र ट्याङ्कीको फाउन्डेसन निर्माण पूर्ण रूपमा सकिएको छ भने ट्याङ्कीहरूको फ्याब्रिकेशन कार्य सम्पन्न भई ढुवानीको चरणमा रहेको छ। निगमले चालु आर्थिक वर्षभित्रै यसको निर्माण सम्पन्न गर्ने लक्ष्य राखेको छ।

हाल कर्णाली प्रदेशमा दैनिक ४० देखि ६० किलोलिटर पेट्रोल र १२० देखि १४० किलोलिटर डिजेल खपत हुने गरेको छ। हाल निगमसँग देशभर कुल १ लाख २ हजार १८४ किलोलिटर इन्धन भण्डारण क्षमता रहेकोमा सुर्खेत डिपो थपिएपछि आपूर्ति व्यवस्था थप सुदृढ र भरपर्दो हुने अपेक्षा गरिएको छ।

भण्डारणगृह निर्माण तथा खपत विवरण