भेरी अस्पतालमा आन्दोलन र द्वन्द्वका घाइतेलाई निःशुल्क उपचार: परिचयपत्र अनिवार्य

नेपालगञ्ज, असोज १५ गते । नेपालगञ्जस्थित भेरी अस्पतालमा विभिन्न राजनीतिक आन्दोलन, सशस्त्र द्वन्द्व तथा प्राकृतिक प्रकोपका क्रममा घाइते भएका व्यक्तिहरूले निःशुल्क औषधोपचार सेवा पाउने भएका छन्।

सरकारद्वारा जारी ‘विभिन्न आन्दोलन, द्वन्द्व तथा प्राकृतिक प्रकोपका घाइतेको निःशुल्क औषधोपचार गरेबापत अस्पताललाई शोधभर्ना दिने कार्यविधि, २०८२’ अनुसार अस्पतालले यो व्यवस्था मिलाएको हो।

अस्पतालका प्रमुख मेडिकल सुपरिटेन्डेन्ट डा. नवीन दर्नालका अनुसार १० वर्षे सशस्त्र द्वन्द्व, २०६२/०६३ को जनआन्दोलन, तराई–मधेश आन्दोलन, तीनकुने प्रदर्शन, भदौ २३ र २४ को जेन-जी आन्दोलन तथा विभिन्न प्राकृतिक प्रकोपमा घाइते भएका नागरिकहरूले यो सेवा प्राप्त गर्नेछन्। जेनजी आन्दोलनका क्रममा मात्रै भेरी अस्पतालमा २५ जना घाइतेको उपचार गरिएको थियो।

निःशुल्क उपचार सेवा प्राप्त गर्नका लागि सम्बन्धित घाइतेसँग गृह मन्त्रालय वा जिल्ला प्रशासन कार्यालयबाट जारी भएको घाइते खुल्ने परिचयपत्र अनिवार्य हुनुपर्नेछ। वडा वा स्थानीय तहको सिफारिसका आधारमा कार्यविधि अनुसार यो सेवा प्रदान गर्न नसकिने अस्पतालले स्पष्ट पारेको छ।

घाइतेहरूको उपचार व्यवस्थापन र आवश्यक समन्वयलाई सहज तथा व्यवस्थित बनाउन अस्पतालले मेडिकल अधिकृत डा. अनुपम सिंह थापालाई फोकल पर्सनको जिम्मेवारी तोकेको छ।