आन्तरिक उडानमा मनपरी भाडा असुले सजाय र दुर्घटनामा १५० हजार डलर क्षतिपूर्तिको प्रस्ताव

काठमाडौँ, असोज १५ गते । आन्तरिक उडानमा मनपरी हवाई भाडा असुल गर्ने तथा यात्रुलाई सङ्कट परेको मौका छोपी बढी भाडा लिने वायुसेवा र टिकट विक्रेतालाई कसुर कायम गरी सजाय गर्ने प्रस्ताव गरिएको छ।

राष्ट्रिय सभामा विचाराधीन ‘आन्तरिक वायुसेवाको दायित्व सम्बन्धमा व्यवस्था गर्न बनेको विधेयक’ माथि विभिन्न सांसदहरूले यस्तो संशोधन प्रस्ताव दर्ता गराउनुभएको हो।

सभाका सदस्य भुवनबहादुर सुनारले मनपरी भाडा असुल गरेमा १० हजार रुपियाँ जरिबाना हुनुपर्ने एकल संशोधन प्रस्ताव गर्नुभएको छ। त्यसै गरी दुर्घटनामा परी यात्रु वा तेस्रो पक्षको मृत्यु भएमा मस्यौदा विधेयकमा १ लाख अमेरिकी डलर क्षतिपूर्ति तोकिएकोमा संशोधनमार्फत १ लाख ५० हजार अमेरिकी डलर (वा सोबराबरको नेपाली रुपियाँ) नजिकको हकवालालाई उपलब्ध गराउनुपर्ने माग गरिएको छ।

यसै गरी, सदस्य खम्मबहादुर खातीले यात्रुको ब्यागेज हराएमा वा नष्ट भएमा प्रतिकिलोग्राम ३० अमेरिकी डलरका दरले अधिकतम ७ सय अमेरिकी डलर क्षतिपूर्ति दिनुपर्ने संशोधन पेस गर्नुभएको छ। मूल मस्यौदामा भने प्रतिकिलोग्राम २० डलरका दरले अधिकतम ५ सय डलर क्षतिपूर्ति दिने प्रस्ताव गरिएको थियो।

संशोधन प्रस्तावमा उडान रद्द, स्थगित वा विलम्ब भएको अवस्थामा यात्रुलाई वैकल्पिक उडान, टिकट रकम फिर्ता तथा आवश्यक परे आवास र भोजनको उचित व्यवस्था वायुसेवाले नै गर्नुपर्ने माग गरिएको छ। सो विधेयकमा राष्ट्रिय सभाका १५ जना सांसदहरूले एकल तथा सामूहिक रूपमा विभिन्न संशोधन दर्ता गराउनुभएको छ।