ईसेवाद्वारा नेपालमै पहिलो पटक डिजिटल वालेटमा ‘बाई नाउ, पे लेटर’ सेवा सुरु: ग्यारो विद्युतीय स्कुटर किस्ताबन्दीमा किन्न सकिने

काठमाडौँ, असोज १३ गते । डिजिटल भुक्तानी प्रदायक कम्पनी ईसेवाले नेपालको डिजिटल वालेट क्षेत्रमा पहिलो पटक ‘बाई नाउ, पे लेटर’ (BNPL) सेवा सार्वजनिक गरेको छ। यस नयाँ सेवाअन्तर्गत ग्राहकहरूले अब ईसेवाको डिजिटल प्लाटफर्म प्रयोग गरी ग्यारो (Garo) ब्रान्डका विद्युतीय स्कुटरहरू खरिद गर्न सक्नेछन्।

यस सेवा सञ्चालनका लागि असोज ८ गते ईसेवाको केन्द्रीय कार्यालयमा ईसेवा, रिलायन्स फाइनान्स लिमिटेड र विद्युतीय स्कुटरको आधिकारिक विक्रेता परिमिता इन्भेस्टमेन्ट प्रा.लि.बिच त्रिपक्षीय साझेदारीपत्रमा हस्ताक्षर भएको छ।

साझेदारीपत्रमा ईसेवाका निवर्तमान प्रमुख कार्यकारी अधिकृत जगदीश खड्का, रिलायन्स फाइनान्सका नायब प्रमुख कार्यकारी अधिकृत रामहरि आचार्य र परिमिता इन्भेस्टमेन्टका तर्फबाट मनन तुलाधरले हस्ताक्षर गर्नुभएको छ।

यस सहकार्यअन्तर्गत ग्राहकले परिमिता इन्भेस्टमेन्टद्वारा बिक्री गरिने विद्युतीय स्कुटर खरिद गर्दा ईसेवामार्फत BNPL (पहिले किन्नुहोस्, पछि भुक्तानी गर्नुहोस्) सुविधा प्राप्त गर्नेछन्। यस कदमले नेपालमा डिजिटल भुक्तानी, वित्तीय सेवा र वातावरणमैत्री विद्युतीय यातायातको पहुँचलाई थप विस्तार गर्ने विश्वास लिइएको छ।