चामलको मूल्य घटाउने प्रतिबद्धता कागजमै सीमित: १४ दिन बित्दा पनि उपभोक्ताले पाएनन् राहत

काठमाडौँ, असोज १३ गते । चामल उद्योगीहरूले १४ दिनअघि नै सरकारसमक्ष चामलको मूल्य प्रतिबोरा दुई सय रुपियाँसम्म घटाउने प्रतिबद्धता जनाए पनि उपभोक्ताले अहिलेसम्म घटेको मूल्यमा चामल किन्न पाएका छैनन्।

उद्योग, वाणिज्य तथा आपूर्तिमन्त्री दीपककुमार साह र वाणिज्य, आपूर्ति तथा उपभोक्ता संरक्षण विभागसँग छुट्टाछुट्टै भएको छलफलमा उद्योगीहरू मूल्य घटाउन सहमत भएका थिए।

असारदेखि भदौ अन्तिमसम्म तीन महिनाको अवधिमा २५ केजीको चामलको बोरामा चार सयदेखि पाँच सय रुपियाँसम्म अस्वाभाविक मूल्यवृद्धि भएको थियो। पहिले दुई हजार दुई सयदेखि दुई हजार तीन सय रुपियाँमा पाइने जिरा मसिनो चामलको मूल्य बढेर अहिले दुई हजार पाँच सयदेखि दुई हजार सात सय रुपियाँसम्म पुगेको छ।

वाणिज्य विभाग र नेपाल खुद्रा व्यापार सङ्घका अनुसार बजार अनुगमन गर्दा चामलको मूल्य घटेको पाइएको छैन। खुद्रा व्यापार सङ्घका अध्यक्ष पवित्र वज्राचार्य र उपभोक्ता अधिकार तथा अनुसन्धान मञ्चका अध्यक्ष माधव तिमिल्सेनाले सरकारको अनुगमन केवल औपचारिकतामा सीमित भएको र मुख्य थोक विक्रेता तथा उद्योगीसम्म पुग्न नसकेको आरोप लगाउनुभयो।

यता, नेपाल खाद्य किराना तथा थोक व्यापार सङ्घका अध्यक्ष देवेन्द्रभक्त श्रेष्ठले भने बाटोको समस्या, ढुवानी खर्च र पुरानो महँगो स्टकका कारण मूल्य घट्न समय लागेको बताउनुभयो। उहाँका अनुसार मुख्य राजमार्गहरू सञ्चालनमा आएसँगै केही दिनभित्रै प्रतिबोरा ७५ देखि १२५ रुपियाँसम्म मूल्य घट्ने र नयाँ धानको सिजन सुरु भएपछि १० देखि १५ प्रतिशतसम्म मूल्य घट्ने दाबी गरिएको छ।