लमजुङका दुई ठूला जलविद्युत् आयोजना पुनः सञ्चालनमा: १२० मेगावाट विद्युत् उत्पादन सुरु

लमजुङ, असोज १२ गते । मर्स्याङ्दी नदीमा पानीको सतह र बहाव बढेपछि आइतबार बिहानदेखि बन्द भएका लमजुङका दुई ठूला जलविद्युत् आयोजनाहरू पुनः सञ्चालनमा आएका छन्।

जिल्लामा सञ्चालित ७० मेगावाटको मध्य मर्स्याङ्दी र ५० मेगावाटको माथिल्लो मर्स्याङ्दी ‘ए’ जलविद्युत् आयोजना सोमबारदेखि पुनः सञ्चालनमा आएका हुन्।

बेँसीसहर नगरपालिका–१ दलालमा रहेको मध्य मर्स्याङ्दी जलविद्युत् आयोजना सोमबार दिउँसोदेखि पुनः सञ्चालनमा आएको छ। आयोजना प्रमुख तारादत्त भट्टराईका अनुसार नदीमा जोखिम बढेपछि उत्पादन बन्द गरी पानी सिधै नदीतर्फ निकास गरिएको थियो, तर बहाव सामान्य बनेपछि पुनः विद्युत् उत्पादन थालिएको हो।

यसैगरी मर्स्याङ्दी गाउँपालिका–८ भुलभुलेमा रहेको ५० मेगावाट क्षमताको माथिल्लो मर्स्याङ्दी ‘ए’ जलविद्युत् आयोजना पनि सोमबार बिहान ११:५० बजेदेखि पूर्ण रूपमा सञ्चालनमा आएको छ।

आयोजनाका इन्जिनियर कर्ण अधिकारीका अनुसार आवश्यक प्राविधिक काम, सरसफाइ तथा अन्य व्यवस्थापन पूरा गरेपछि विद्युत् उत्पादन सुरु गरिएको हो। मर्स्याङ्दी नदीमा बाढी र लेदोका कारण सुरक्षालाई ध्यानमा राख्दै रोकिएको कुल १२० मेगावाट विद्युत् उत्पादन पुनः सुचारु भएपछि प्रणालीमा सहजता आएको छ।