उपत्यकामा तरकारीको तीव्र अभाव: ४० प्रतिशतले घट्यो आपूर्ति, भाउ अकासियो

काठमाडौँ, असोज १२ गते । सोह्रश्राद्ध सुरु भएसँगै काठमाडौँ उपत्यकामा तरकारीको माग ह्वात्तै बढेको छ। तर, देशभर परेको अविरल वर्षा र बाढी-पहिरोले मुख्य राजमार्गहरू अवरुद्ध हुँदा उपत्यकावासीले महँगो मूल्य तिरेर पनि ताजा तरकारी पाउन सकिरहेका छैनन्। तरकारी भित्रिने मुख्य नाकाहरूमा सवारी साधन रोकिएका कारण बजारमा उपभोक्ता र व्यापारी दुवै समस्यामा परेका छन्।

कालीमाटी फलफूल तथा तरकारी बजार विकास समितिका अनुसार उपत्यकामा बाहिरी जिल्लाबाट हुने तरकारीको आपूर्ति झन्डै ४० प्रतिशतले घटेको छ। सामान्य अवस्थामा दैनिक औसत नौ सय मेट्रिक टन तरकारी भित्रिने कालीमाटीमा अहिले जम्मा पाँच सय मेट्रिक टनको हाराहारीमा मात्रै आइरहेको छ। धादिङ, काभ्रे, मकवानपुर, चितवन तथा तराईका जिल्लाहरूबाट आउने तरकारी सडकमै अड्किएका वा बारीमै कुहिएका छन्।

आपूर्तिमा आएको भारी गिरावटसँगै बजारमा तरकारीको मूल्य तीव्र रूपमा बढेको छ। असोज ५ गते प्रतिकेजी ६५ रुपियाँ रहेको गोलभेँडाको थोक मूल्य असोज ११ गतेसम्म आइपुग्दा बढेर ११० रुपियाँ पुगेको छ। त्यस्तै काउली, घिउसिमी, बोडी, बन्दा, प्याज तथा सागपातको मूल्यमा समेत प्रतिकेजी ५ रुपियाँदेखि २५ रुपियाँसम्म वृद्धि भएको छ।

स्थानीय उत्पादन सङ्कलन गरी बजारसम्म पुर्‍याउने प्रयास भइरहे पनि उपत्यकाको ८० प्रतिशत माग धान्ने कालीमाटीसहित बल्खु, बालाजु र कोटेश्वरका साना बजारहरूमा समेत तरकारीको अभाव उस्तै छ। अहिलेको यो सङ्कट र मूल्य वृद्धि नियन्त्रणका लागि शीतभण्डार (कोल्ड स्टोर) मा रहेका आलु तथा प्याज जस्ता मौज्दात वस्तुहरू बजारमा पठाउनुपर्ने व्यापारीहरू बताउँछन्।