पृथ्वी राजमार्गको घाँसीकुवामा पुनः लेदोसहितको पहिरो: मुग्लिङ–पोखरा सडकखण्ड पूर्ण रूपमा अवरुद्ध

तनहुँ, असोज १२ गते । पृथ्वी राजमार्ग अन्तर्गत तनहुँको व्यास नगरपालिका–१२ घाँसीकुवामा सोमबार बिहान पुनः पहिरो खसेपछि मुग्लिङ–पोखरा सडकखण्ड पूर्ण रूपमा अवरुद्ध भएको छ। सडक माथिबाट लेदोसहितको पहिरो खसेपछि राजमार्गमा आवतजावत ठप्प बनेको हो।

जिल्ला प्रहरी कार्यालय तनहुँका सूचना अधिकारी एवम् प्रहरी नायब उपरीक्षक (डिएसपी) द्वारिकाप्रसाद घिमिरेका अनुसार बिहान करिब १२:१० बजे लेदोसहितको पहिरो खसेर सडक अवरुद्ध भएको हो। घटनाको जानकारी पाउनासाथ प्रहरी टोली घटनास्थलमा खटिएर सडक खुलाउने पहल भइरहेको छ।

लगातारको वर्षाका कारण घाँसीकुवा क्षेत्रमा पछिल्ला केही दिनदेखि पटक-पटक पहिरो खस्दै आएको छ। वर्षा रोकिए पनि माथिबाट लेदो खस्ने क्रम जारी रहेकाले उक्त क्षेत्रमा जोखिम कायमै रहेको र आवागमन गम्भीर रूपमा प्रभावित भएको प्रहरीले जनाएको छ।

प्रहरीका अनुसार मुग्लिङ–पोखरा सडकखण्डका घाँसीकुवासहित मौरीबास, मादीपुल, मुसेखोला, छिर्कने, बिमलनगर, डुम्रे आसपास, सानो डुम्रे र ऐनापहरा क्षेत्रमा समेत पहिरोको उच्च जोखिम छ। प्रहरीले राजमार्गको अवस्था बुझेर मात्र यात्रा गर्न र जोखिमयुक्त स्थानमा सवारी नरोक्न अनुरोध गरेको छ।