मनाङमा बाढी र हिमपहिरोको वितण्डा: तालगाउँका १५ घर डुबानमा, हिमलुङमा १० जना बेपत्ता

मनाङ, असोज ११ गते । शनिबार रातभर परेको अविरल वर्षा र मर्स्याङ्दी नदीमा आएको बाढीका कारण मनाङको नासोँ गाउँपालिका–१ स्थित तालगाउँका १२ घर पूर्ण डुबानमा परेका छन् भने ३ घरको कम्पाउन्डभित्र बाढी पसेको छ।

चारैतिरबाट बाढी र कटानले घेरिएको तालगाउँका प्रभावित बासिन्दाहरूलाई राति नै साइरन बजाएर माथिल्लो भेगका गुम्बा, विद्यालय र स्वास्थ्य संस्थामा सुरक्षित रूपमा स्थानान्तरण गरिएको छ।

यसैबिच नारफूस्थित हिमलुङ हिमाल क्षेत्रमा आइतबार बिहान गएको भयानक हिमपहिरोमा परी १० जना बेपत्ता भएका छन्। अल्पाइन ट्रेक एन्ड ट्राभल्स मार्फत हिमाल आरोहण तथा भ्रमणमा गएका उनीहरू सबै नेपाली नागरिक रहेको प्रारम्भिक सूचना प्राप्त भएको छ। उद्धारका लागि घटनास्थलमा हेलिकप्टर परिचालन गरी खोजी कार्य तीव्र पारिएको जिल्ला प्रशासन कार्यालय मनाङले जनाएको छ।

बाढीका कारण सदरमुकाम चामेमा पाँच वटा घर पूर्ण रूपमा ध्वस्त भएका छन् भने एक घरमा आंशिक क्षति पुगेको छ। नासोँ–९ एक्लोभट्टी र वडा नं. ८ ताचै जोड्ने झोलुङ्गे पुल, सडक तथा ठाडो खोलाका काठे पुलहरू बगेपछि मर्स्याङ्दी वारपारको सम्पर्क टुटेको छ। माथिल्लो मनाङमा बिजुली, यातायात र सञ्चार सम्पर्क पूर्ण रूपमा विच्छेद भएको छ, जसलाई सामान्य बनाउन कम्तीमा दुई हप्ता लाग्ने अनुमान छ।

संरक्षित क्षेत्रभित्र पर्ने भएकाले जग्गाको लालपूर्जाविहीन रहेका तालगाउँका स्थानीय होटल व्यवसायीहरू बाढीले सर्वस्व गुमाएपछि थप मारमा परेका छन्। २०७८ को विनाशकारी बाढीपछि पुनः यस्तै विपद् भोगेका स्थानीयहरू हाल आफन्तकोमा शरण लिएर बसिरहेका छन्। हालसम्म मानवीय क्षति नभए पनि नदी कटान र बाढीको जोखिम अझै उच्च रहेको छ।