सवारी चालक अनुमतिपत्रको परीक्षा स्थगित: नयाँ तालिका सार्वजनिक

तनहुँ, असोज १० गते । अविरल वर्षा र त्यसबाट उत्पन्न हुन सक्ने सम्भावित जोखिमलाई ध्यानमा राख्दै यातायात व्यवस्था कार्यालय तनहुँ (डुम्रे) ले सवारी चालक अनुमतिपत्र (लाइसेन्स) को लिखित तथा प्रयोगात्मक (ट्रायल) परीक्षा स्थगित गरेको छ। तनहुँको बन्दीपुर गाउँपालिका–४, विमलनगरमा रहेको कार्यालयले मौसम विज्ञान विभागको भारी वर्षाको पूर्वानुमानलाई दृष्टिगत गर्दै परीक्षा तालिका संशोधन गरेको हो।

जल तथा मौसम विज्ञान विभागले असोज ९ देखि ११ गतेसम्म देशका अधिकांश स्थानमा भारी वर्षाको सम्भावना औंल्याएको र डुम्रे बजार क्षेत्रमा समेत निरन्तर वर्षा भइरहेकाले परीक्षा सञ्चालन गर्न असहज स्थिति सिर्जना भएको हो। सोही कारण असोज ९ र १२ गतेका लागि तय गरिएका लिखित तथा प्रयोगात्मक परीक्षाहरू स्थगित गरिएका हुन्।

कार्यालयद्वारा जारी संशोधित तालिका अनुसार असोज ९ गतेका लागि निर्धारित मोटरसाइकल, स्कुटर र कारको लिखित परीक्षा अब असोज १२ गते सञ्चालन हुनेछ। त्यसैगरी, असोज १२ गतेका लागि तय गरिएको मोटरसाइकल र स्कुटरको प्रयोगात्मक (ट्रायल) परीक्षा भने असोज १४ गते सञ्चालन गरिनेछ।

कार्यालयका कम्प्युटर अधिकृत रामकृष्ण श्रेष्ठका अनुसार स्थगित भएका परीक्षाबाहेक कार्यालयबाट प्रवाह हुने अन्य नियमित सेवाहरू र बाँकी परीक्षा तालिकाहरू भने यथावत् रूपमा सञ्चालन हुनेछन्। परीक्षार्थीहरूलाई नयाँ तालिका अनुसार परीक्षा केन्द्रमा उपस्थित हुन कार्यालयले सूचित गरेको छ।

मुख्य विवरण तथा नयाँ परीक्षा तालिका