ढोरपाटन सिकार आरक्षमा नयाँ याम सुरु: १० नाउर र ७ झारलको सिकार गर्न विदेशी सिकारी नेपाल आउँदै

बागलुङ, असोज १० गते । नेपालको एकमात्र सिकार आरक्ष ढोरपाटनमा यस वर्षको पहिलो सिकार याम (असोज–मंसिर) औपचारिक रूपमा सुरु भएको छ। राष्ट्रिय निकुञ्ज तथा वन्यजन्तु संरक्षण विभागले यस यामका लागि कुल १० वटा नाउर र ७ वटा झारलको सिकार गर्न अनुमति दिएको छ। अनुमति पाएका विदेशी सिकारीहरू बन्दोबस्तीका सामानसहित नेपाल आउने तयारीमा जुटेका छन्।

आरक्षका प्रमुख संरक्षण अधिकृत अणनाथ बरालका अनुसार सिकारका लागि रुस, अमेरिका, स्पेन, डेनमार्क, अफ्रिका र फ्रान्सलगायतका देशहरूबाट विश्वका धनाढ्य सिकारीहरू आउने गरेका छन्। कृषि, वन तथा वातावरण मन्त्रालयअन्तर्गतको विभागले खुला प्रतिस्पर्धाका आधारमा गत भदौ ४ गते दरभाउपत्र आह्वान गरी सिकार कम्पनीहरूमार्फत यो प्रक्रिया अघि बढाएको हो।

नेपाल आउने विदेशी सिकारीहरू हेलिकोप्टरमार्फत सोझै ढोरपाटनका विभिन्न सिकार ब्लकहरूमा पुग्ने गर्छन्। आरक्षमा सुर्तिबाङ, फागुने, बार्से, सेङ, दोगाडी, घुस्तुङ र सुनदह गरी सात वटा सिकार ब्लकहरू निर्धारण गरिएका छन्। सिकारका क्रममा विदेशी सिकारीहरूसँगै नेपाली सहयोगी र आरक्षका कर्मचारीहरू पनि खटिने गर्छन्।

विक्रम संवत् २०४४ मा स्थापना भई पूर्वी रुकुम, बागलुङ र म्याग्दी जिल्लामा फैलिएको ढोरपाटन आरक्षमा वर्षमा दुई याम (असोज–मंसिर र फागुन–वैशाख) मा सिकार खेलाइने गरिन्छ। गत वर्ष दुवै याम गरी २१ नाउर र ११ झारलको सिकारबाट ४ करोड १७ लाख रुपियाँ राजस्व सङ्कलन भएको थियो भने यस यामको राजस्व बुझाउने काम हाल भइरहेको छ।