सेयर बजारमा ‘इन्ट्राडे ट्रेडिङ’ लागु गर्दै सेबोन: एउटै दिनमा सेयर खरिदबिक्री गर्न सकिने (सूचीसहित)

काठमाडौँ, असोज ९ गते । नेपालको सेयर बजारको कारोबार प्रणालीमा नयाँ अभ्यास थप्दै नेपाल धितोपत्र बोर्ड (सेबोन) ले एउटै कारोबार दिनभित्र सेयर खरिदबिक्री गर्न सकिने अन्तर-दिवसीय कारोबार (इन्ट्राडे ट्रेडिङ) कार्यान्वयनको प्रक्रिया अगाडि बढाएको छ। बोर्डले यसका लागि ‘नेपालमा धितोपत्रको अन्तरदिवसीय कारोबार कार्यान्वयनसम्बन्धी अवधारणापत्र, २०८३’ सार्वजनिक गरेको छ।

प्रारम्भिक चरणमा लगानीकर्ताले पहिले सेयर खरिद गरेर सोही दिन बिक्री गर्ने ‘बाई फस्ट, सेल लेटर’ (Buy First, Sell Later) मोडेलबाट कारोबार सुरु गर्ने प्रस्ताव गरिएको छ। बजारमा तरलता, मूल्य अन्वेषण र कारोबारको गतिशीलता बढाउने उद्देश्यसहित बोर्डले यो व्यवस्था चरणबद्ध र जोखिममा आधारित भएर लागु गर्न लागेको हो।

इन्ट्राडे कारोबार नेप्सेमा सूचीकृत सबै कम्पनीका सेयरमा भने उपलब्ध हुने छैन। पर्याप्त तरलता, मूल्य स्थिरता, सार्वजनिक सेयर स्वामित्व तथा संस्थागत सुशासनका आधारमा छनोट गरिएका ‘इन्ट्राडे एलिजिबल सेक्युरिटिज‘ मा मात्र यो सुविधा पाइनेछ। अत्यधिक मूल्य अस्थिरता र न्यून कारोबार हुने कम्पनीहरूलाई प्रारम्भिक चरणमा बाहिर राखिनेछ।

इन्ट्राडे सामान्य कारोबारभन्दा बढी जोखिमयुक्त हुने भएकाले सक्रिय डिम्याट, अद्यावधिक केवाइसी र जोखिम जानकारी स्वीकृत गरेका लगानीकर्ताले मात्र कारोबार गर्न पाउनेछन्। ब्रोकरहरूले ग्राहकको वित्तीय क्षमता र बजारसम्बन्धी ज्ञानको मूल्याङ्कन गरेर मार्जिन (प्रारम्भिक, मेन्टेनेन्स, एक्सपोजर र पिक मार्जिन) निर्धारण गरी ‘रिस्क फर्स्ट, ट्रेडिङ सेकेन्ड’ को अवधारणामा कारोबार सञ्चालन गर्नेछन्।

मुख्य विवरण तथा अवधारणापत्रका प्रमुख बिन्दुहरू