४० मेगावाटको राहुघाट जलविद्युत् आयोजनाबाट परीक्षण उत्पादन सुरु, ९ अर्ब लागतमा सम्पन्न (सूचीसहित)

काठमाडौँ, असोज ९ गते । म्याग्दीको रघुगङ्गा गाउँपालिकामा निर्माण भएको ४० मेगावाट क्षमताको राहुघाट जलविद्युत् आयोजनाले बिहीबारदेखि परीक्षण विद्युत् उत्पादन सुरु गरेको छ।

नेपाल विद्युत् प्राधिकरणको सहायक कम्पनी रघुगङ्गा हाइड्रोपावर लिमिटेडले निर्माण गरेको यस अर्धजलाशययुक्त आयोजनाका २०/२० मेगावाटका दुई टर्वाइनमार्फत पूर्ण क्षमतामा उत्पादन थालिएको हो।

उत्पादित विद्युत् आयोजनाको स्विचयार्ड हुँदै दाना–कुस्मा २२० केभी प्रसारण लाइनमार्फत राष्ट्रिय प्रसारण प्रणालीमा जोडिएको छ। नेपाल विद्युत् प्राधिकरणसँगको विद्युत् खरिद सम्झौता अनुसार १५ दिनको सफल परीक्षण उत्पादनपछि आयोजनाबाट व्यावसायिक रूपमा विद्युत् उत्पादन र आपूर्ति सुरु हुनेछ।

रघुगङ्गा गाउँपालिकाको दग्नाम र झीँको फेदीमा बाँध निर्माण गरी ६ किलोमिटर २७० मिटर लामो मुख्य सुरुङमार्फत तिल्केनी चौरमा रहेको विद्युत्गृहमा पानी पुर्‍याइएको छ। यस आयोजनाबाट वार्षिक २४ करोड ५ लाख ९३ हजार युनिटभन्दा बढी विद्युत् उत्पादन हुने लक्ष्य राखिएको छ, जसमध्ये सुक्खायाममा ३३ प्रतिशत र वर्षायाममा ६७ प्रतिशत उत्पादन हुनेछ।

वि.सं. २०६७ मा निर्माण सुरु भए पनि ठेकेदार कम्पनीको ढिलासुस्ती र ठेक्का रद्दका कारण आयोजना सम्पन्न हुन करिब डेढ दशक लाग्यो। सुरुमा भारतीय कम्पनी आइभिआरसिएलसँग सम्झौता भए पनि काम नभएपछि २०७४ मा जयप्रकाश एसोसिएट्स (जेपी) लाई जिम्मा दिइएको थियो। अनुमानित लागत रु. ८ अर्ब ५९ करोड रहेकामा आयोजना निर्माण सम्पन्न हुँदा करिब ९ अर्ब रुपियाँ खर्च भएको छ।

प्रमुख विवरण तथा आयोजना सारसंक्षेप