सेयर बजार ७.०६ अंकले बढ्यो, कारोबार रकम ७ अर्ब नाघ्यो

काठमाडौँ, असोज ६ साताको पहिलो कारोबार दिन आज धितोपत्र बजारमा सेयर कारोबार मापक नेप्से परिसूचक ७.०६ अंकले बढेर २६५४ बिन्दुमा कायम भएको छ। परिसूचकमा आएको सामान्य सुधारसँगै आज कारोबार रकममा पनि बढोत्तरी भएको छ। अघिल्लो कारोबार दिन ६ अर्ब ७४ करोड रुपैयाँको सेयर कारोबार भएकोमा आज त्यो बढेर ७ अर्ब ४ करोड रुपैयाँ पुगेको छ।

आजको कारोबारमा उपसमूहतर्फ अन्य समूहमा सर्वाधिक आकर्षण देखिएको छ। यो समूहको सूचक १.३६ प्रतिशतले बढेको छ। त्यस्तै बैंकिङ (०.३५%), विकास बैंक (०.४३%), होटल तथा पर्यटन (०.३१%), लगानी (०.४८%), जीवन बीमा (०.८२%) र माइक्रोफाइनान्स उपसमूह (०.४८%) बढेका छन्। अर्कोतर्फ फाइनान्स, जलविद्युत्, उत्पादन तथा प्रशोधन, निर्जीवन बीमा र व्यापार उपसमूहका सूचकमा भने गिरावट आएको छ।

बजारमा आज कुल १३७ वटा कम्पनीको सेयर मूल्य बढेको छ भने १३१ कम्पनीको मूल्य घटेको छ। त्यसैगरी ११ वटा कम्पनीको सेयर मूल्य भने स्थिर रहेको छ। आज मिडसोलु हाइड्रोपावरको मूल्य सबैभन्दा धेरै १५ प्रतिशतले वृद्धि भएको छ भने फर्स्ट माइक्रोफाइनान्स, मैलुङखोला जलविद्युत र मान्डु हाइड्रोपावरका शेयरधनीले पनि राम्रो कमाएका छन्। स्नो रिभर्स र नारायणी डेभलपमेन्ट बैंकका शेयरधनीले भने धेरै गुमाउनुपरेको छ।

आज धेरै कारोबार हुने कम्पनीहरूको सूचीमा हाथवे इन्भेस्टमेन्ट, हिमालयन डिस्टिलरी, घलेम्दी हाइड्रोपावर, लिबर्टी इनर्जी, कुमारी बैंक, सानिमा मिडिल तमोर र लक्ष्मी सनराइज बैंक अगाडि रहेका छन्। त्यसैगरी ग्लोबल आईएमई बैंक, सिद्धार्थ बैंक र शिवम् सिमेन्ट पनि उच्च कारोबार गर्ने कम्पनीहरूको सूचीमा पर्न सफल भएका छन्।