काठमाडौं, आश्विन ६ गते। देशभर मनसुनी वायुका साथै पश्चिमी वायुको समेत आंशिक प्रभाव रहेकाले आगामी २४ घण्टामा देशका अधिकांश भूभागमा वर्षाको सम्भावना रहेको मौसम पूर्वानुमान महाशाखाले जनाएको छ।
महाशाखाका अनुसार हाल बंगालको खाडीको मध्य–पश्चिमी भूभाग आसपास न्यून चापीय क्षेत्र (Depression) रहेको छ। उक्त प्रणाली आगामी दिनमा थप शक्तिशाली बन्दै ‘डीप डिप्रेसन’ (बलियो न्यून चापीय क्षेत्र) का रूपमा पश्चिम–उत्तरपश्चिम दिशातर्फ सर्ने सम्भावना रहेको छ।
आज दिउँसो
आज दिउँसो देशका हिमाली तथा पहाडी भूभागमा सामान्यतया बदली र तराई क्षेत्रमा आंशिक बदली रहनेछ।
कोशी, बागमती र गण्डकी प्रदेशका हिमाली तथा पहाडी भूभागका केही स्थानमा तथा लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका थोरै स्थानमा मेघगर्जन/चट्याङसहित मध्यम वर्षा तथा हिमपात हुने सम्भावना रहेको छ।
कोशी र बागमती प्रदेशका तराई भूभागका थोरै स्थान तथा मधेश, गण्डकी, लुम्बिनी र सुदूरपश्चिम प्रदेशका तराई भूभागका एक–दुई स्थानमा पनि मेघगर्जन/चट्याङसहित मध्यम वर्षाको सम्भावना रहेको छ।
यसैगरी, कोशी, बागमती, गण्डकी र लुम्बिनी प्रदेशका पहाडी भूभागका एक–दुई स्थानमा भारी वर्षा हुन सक्ने महाशाखाले जनाएको छ।
आज राति
रातिको समयमा कोशी, मधेश र बागमती प्रदेशलगायत देशका हिमाली भूभाग तथा गण्डकी र लुम्बिनी प्रदेशका पहाडी भूभागमा सामान्यतया बदली रहनेछ। कर्णाली र सुदूरपश्चिम प्रदेशका पहाडी भूभाग तथा बाँकी तराई क्षेत्रमा भने आंशिक बदली रहनेछ।
कोशी, बागमती र गण्डकी प्रदेशका हिमाली तथा पहाडी भूभागका केही स्थानमा तथा लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका एक–दुई स्थानमा मेघगर्जन/चट्याङसहित मध्यम वर्षाको सम्भावना छ।
मधेश प्रदेश तथा कोशी, बागमती र गण्डकी प्रदेशका तराई भूभागका थोरै स्थानमा र लुम्बिनी तथा सुदूरपश्चिम प्रदेशका तराई भूभागका एक–दुई स्थानमा पनि मेघगर्जन/चट्याङसहित मध्यम वर्षा हुन सक्ने पूर्वानुमान छ।
राति कोशी र बागमती प्रदेशका पहाडी भूभाग तथा मधेश प्रदेशका एक–दुई स्थानमा भारी वर्षा हुने सम्भावना रहेको छ।
मौसम प्रणाली थप शक्तिशाली बन्ने
मौसम विश्लेषणअनुसार बंगालको खाडीमा रहेको न्यून चापीय क्षेत्र आगामी दिनमा थप शक्तिशाली हुँदै डीप डिप्रेसन का रूपमा पश्चिम–उत्तरपश्चिम दिशातर्फ अघि बढ्ने देखिएको छ।
यसका कारण आगामी दिनमा नेपालमा वर्षाको गतिविधि थप प्रभावकारी हुन सक्ने भएकाले विशेषगरी भारी वर्षाको सम्भावना रहेका पहाडी तथा तराईका क्षेत्रमा सतर्कता अपनाउन आवश्यक देखिन्छ।
स्रोत: मौसम पूर्वानुमान महाशाखा
What if you could work from Anywhere?
Explore More with something that can change your Life!
