उद्योग दर्ता र नवीकरण अब अनलाइनबाटै: कार्यालय धाउनुपर्ने झन्झटको अन्त्य

चितवन, असोज ६ गते । चितवनमा उद्योग दर्ता तथा नवीकरणका लागि अब कार्यालयमै पुग्नुपर्ने बाध्यता हटेको छ। उद्योग, वाणिज्य तथा पर्यटन कार्यालय चितवनले सेवाग्राहीलाई सहज, छिटो र झन्झटमुक्त सेवा दिने उद्देश्यले उद्योग दर्ता र नवीकरण प्रक्रियालाई पूर्ण रूपमा अनलाइन बनाएको छ।

कार्यालयका प्रमुख उद्योग अधिकृत विनोद पौडेलका अनुसार परीक्षणका रूपमा सञ्चालन गरिएको यो सेवालाई मङ्गलबारदेखि अनिवार्य गरिएको हो। सेवाग्राहीहरूले अब कार्यालयको आधिकारिक वेबसाइटमार्फत नै आवश्यक सम्पूर्ण कागजात र विवरण पेस गरेर घरमै बसी दर्ता प्रक्रिया पूरा गर्न सक्नेछन्।

नयाँ व्यवस्थापछि भरतपुर महानगरपालिका–६ का अनिश श्रेष्ठले आफ्नो ‘जाम फुड्स’ मम उद्योग अनलाइनबाटै दर्ता गर्नुभएको छ। अनलाइन प्रणाली सुरु भएसँगै उद्योगी-व्यवसायीहरूलाई कार्यालय धाउनुपर्ने, घण्टौँ लाइन बस्नुपर्ने र समय तथा थप खर्च बेहोर्नुपर्ने बाध्यताबाट मुक्ति मिलेको छ।

कार्यालयको तथ्याङ्क अनुसार चितवनमा हाल करिब १७ हजार उद्योग दर्ता भएकामा १३ हजार नवीकरण अवस्थामा छन्। यसैगरी वाणिज्यतर्फ करिब २३ हजार फर्म दर्ता रहेका छन्। हाललाई यो अनलाइन सुविधा उद्योगतर्फ मात्रै लागू गरिए पनि आगामी दिनमा वाणिज्यतर्फ पनि विस्तार गरिने लक्ष्य लिइएको छ।

चितवनमा अनलाइन उद्योग दर्तासम्बन्धी मुख्य तथ्यहरू