कोरला नाकाबाट भन्सार असुलीमा नयाँ रेकर्ड: दुई महिनामै ३ अर्बभन्दा बढी राजस्व सङ्कलन

मुस्ताङ, असोज ४ गते । उपल्लो मुस्ताङको लोमान्थाङ–४, नेचुङस्थित मुस्ताङ भन्सार कार्यालयले चालु आर्थिक वर्ष २०८३/८४ को सुरुवाती दुई महिनामा ३ अर्ब ७ करोड ९३ लाख रुपियाँभन्दा बढी राजस्व सङ्कलन गरेको छ। साउनमा २६ करोड ३९ लाख रुपियाँ राजस्व उठेकामा भदौ महिनामा यो रकम ह्वात्तै बढेर २ अर्ब ८१ करोड ५४ लाख रुपियाँ पुगेको हो।

भोटेकोशी नदीको बाढीले रसुवागढी भन्सार कार्यालय प्रभावित भएपछि उत्तरी नाका लिजी–नेचुङ (कोरला) मा व्यापारिक चाप अत्यधिक बढेको छ। आगामी चाडपर्वलाई लक्षित गरी चीनबाट भित्रिएका विद्युतीय सवारीसाधन (इभी), घरायसी सामान, कस्मेटिक, लत्ताकपडा र विद्युतीय उपकरण बोकेका कन्टेनरहरूबाट सो परिमाणमा राजस्व सङ्कलन भएको भन्सार प्रमुख बिदुर चुडालले जानकारी दिनुभयो।

विशेष गरी भदौ महिनामा विद्युतीय सवारीसाधनको आयातमा ठूलो वृद्धि भएको छ। साउनमा १०० वटा मात्रै इभी आयात भएकोमा भदौमा बढेर १,२२३ वटा पुगेको छ। साउनमा ५७ वटा मालबाहक कन्टेनर भित्रिएकामा भदौमा ६९७ वटा पुगेका छन्। इभीको आयातबाट मात्रै २ अर्ब ११ करोड ३० लाख रुपियाँ राजस्व सङ्कलन भएको छ।

नाकामा विद्युतीय सवारी र कन्टेनरको बाक्लो उपस्थिति र सडकमा जाम बढेपछि कालीगण्डकी करिडोर सडकखण्ड स्तरोन्नति तथा पहिरो नियन्त्रणको कामलाई तीव्रता दिइएको छ। सन् १९६० को दशकदेखि ठप्प रहेको र २०८० कात्तिक २७ गते औपचारिक रूपमा खुलेको कोरला नाकामा अहिले व्यापारी, चालक र मजदुरहरूको चहलपहल व्यापक बढेको छ।

भन्सार तथा आयात सम्बन्धी मुख्य सारसंक्षेप: