रेसुङ्गा विमानस्थलबाट हुने उडान तीन महिनादेखि अन्योलमा

गुल्मी, असोज ३ गते । मौसममा आएको प्रतिकूलताका कारण गुल्मीको रेसुङ्गा विमानस्थलबाट हुने नियमित हवाई उडान विगत तीन महिनादेखि प्रभावित भएको छ।

वर्षायाम सुरु भएसँगै बिहानको समयमा बाक्लो हुस्सु लाग्ने र मौसम बिग्रिने भएकाले गत जेठ २४ गतेदेखि काठमाडौँ–रेसुङ्गा रुटमा हवाई सेवा सहज रूपमा सञ्चालन हुन नसकेको नेपाल एयरलाइन्सका स्टेशन प्रमुख सुमन थापाले जानकारी दिनुभएको छ।

नेपाल एयरलाइन्सले साताको तीन दिन (शनिबार, आइतबार र बिहीबार) काठमाडौँबाट बिहान ६:३० बजे र रेसुङ्गाबाट ७:४५ बजे उडान गर्ने तालिका तय गरे पनि मौसमकै कारण नियमितता पाउन सकेको छैन।

हाल गुल्मीबाट काठमाडौँका लागि रु. १०,५१० र काठमाडौँबाट गुल्मीका लागि रु. १०,७१० भाडा निर्धारण गरिएको छ। हवाई इन्धनको मूल्यवृद्धिसँगै भाडा बढेको र सडक पूर्वाधारमा सुधार आई सुविधायुक्त सवारी साधन चल्न थालेकाले हवाई यात्रुको सङ्ख्यामा समेत कमी आएको छ। मौसम अनुकूल हुनासाथ नियमित उडान पुनः सञ्चालनमा ल्याइने आयोजनाले जनाएको छ।

रेसुङ्गा विमानस्थल उडान र भाडादर विवरण