पुँजी बजार सुधार कार्ययोजनाको उत्साह एकैदिनमै सुस्तायो: २१.१९ अङ्कले घट्यो नेप्से

काठमाडौँ, भदौ ३१ गते । सरकारले ल्याएको पुँजी बजार सुधार कार्ययोजनापछि मङ्गलबार ४८ अङ्कले बढेको सेयर बजारमा बुधबार भने गिरावट आएको छ। साताको चौथो कारोबार दिन नेप्से परिसूचक २१.१९ अङ्कले घटेर २६१२.४३ विन्दुमा ओर्लिएको छ।

सोमबार साँझ अर्थमन्त्री डा. स्वर्णिम वाग्लेले पुँजीगत लाभकर आधा घटाउनेसहित २१ बुँदे कार्ययोजना सार्वजनिक गरेपछि त्यसको सकारात्मक प्रभाव मङ्गलबारको बजारमा मात्र सीमित रह्यो। मङ्गलबार आठ अर्ब २९ करोड रुपियाँको उच्च कारोबार भएकोमा बुधबार कारोबार रकम घटेर पाँच अर्ब ३८ करोड रुपियाँमा खुम्चिएको छ।

आज कारोबारमा आएका सबै समूहगत सूचकहरू राताम्मे बनेका छन्। जसमध्ये जलविद्युत् समूह १.०४ प्रतिशत र जीवन बीमा समूह १.०१ प्रतिशतले घटेका छन्। कुल ४२ कम्पनीको सेयर मूल्य बढ्दा २२५ कम्पनीको मूल्य घटेको छ भने १२ कम्पनीको मूल्य स्थिर रहेको छ।

नारायणी डेभलपमेन्ट बैङ्कको सेयर मूल्य सबैभन्दा बढी ६.३७ प्रतिशतले बढ्दा रिजलाइन इनर्जीको सेयर मूल्य ५.२१ प्रतिशतले घटेको छ। आज हिमाल दोलखा हाइड्रोपावर, रिलायन्स स्पिनिङ मिल्स, शिवम् सिमेन्ट, सोलु हाइड्रोपावर, लिबर्टी इनर्जी र एनआरएन इन्फ्रास्ट्रक्चर धेरै कारोबार हुने कम्पनीहरूको अग्रस्थानमा रहे।

बजार सूचक तथा कारोबारको मुख्य विवरण: