नेपाली कांग्रेसको १५औँ महाधिवेशन: सभापति गगनकुमार थापाद्वारा ‘राष्ट्रिय पुनर्जागरण र समुन्नति’ को राजनीतिक प्रतिवेदन पेस

काठमाडौँ, असोज २० गते । नेपाली कांग्रेसले राजनीतिक आन्दोलनबाट प्राप्त उपलब्धिलाई नागरिकको दैनिक जीवनमा अनुभूत हुने परिणाममा रूपान्तरण गर्ने लक्ष्यसहित पार्टीको आगामी राजनीतिक यात्रा ‘राष्ट्रिय पुनर्जागरण र समुन्नति’ को अवधारणामा केन्द्रित गर्ने प्रस्ताव अघि सारेको छ।

१५ औँ महाधिवेशनको बन्दसत्रमा सभापति गगनकुमार थापाले पेस गर्नुभएको राजनीतिक प्रस्तावमा निर्वाचन र सत्ताकेन्द्रित राजनीतिबाट माथि उठ्दै नागरिकको जीवनमा प्रत्यक्ष परिणाम दिने राष्ट्रिय शक्तिका रूपमा पार्टीलाई पुनर्स्थापित गर्ने नयाँ राजनीतिक कार्यदिशा प्रस्ताव गरिएको छ।

प्रतिवेदनले नेपाली कांग्रेसलाई ‘राष्ट्रिय शक्तिको छैटौँ अध्याय’ मा प्रवेश गराउने अवधारणा अघि सार्दै राष्ट्रियता, लोकतन्त्र र समाजवादलाई नयाँ ढङ्गले पुनः परिभाषित गरेको छ। विगतका कमजोरीहरूको आत्मसमीक्षा गर्दै प्रतिवेदनमा आगामी निर्वाचनमा कुनै पनि निर्वाचनपूर्व गठबन्धन नगरी आफ्नै उम्मेदवार र कार्यक्रमसहित चुनावी मैदानमा उत्रिने प्रतिबद्धता जनाइएको छ।

साथै, २०८२ भदौमा भएको युवा विद्रोहलाई नयाँ पुस्ताको राजनीतिक चेतना र सुशासनको मागका रूपमा चित्रण गर्दै भदौ २३–२४ का घटनाको निष्पक्ष छानबिन हुनुपर्ने ठहर गरिएको छ।

बन्दसत्रमा उपसभापति विश्वप्रकाश शर्माले ‘राजनीतिक संस्कृतिको क्षय र युगानुकूल रूपान्तरणको अभिभारा’ शीर्षकमा राजनीतिक प्रतिवेदन पेस गर्नुभएको छ भने कोषाध्यक्ष उमेश श्रेष्ठले आर्थिक प्रतिवेदन पेस गर्नुभएको छ। मङ्गलबार यी प्रतिवेदनहरूमाथि थप छलफल गरी पारित गरिनेछ र बिहान १० बजेदेखि नयाँ नेतृत्वका लागि उम्मेदवारहरूको मनोनयन दर्ता प्रक्रिया सुरु हुनेछ।

यसैबीच महाधिवेशनको बन्दसत्रले महामन्त्री प्रदीप पौडेलद्वारा पेस गरिएको संशोधित विधान प्रस्ताव पारित गरेको छ। नयाँ विधान अनुसार नेपाली कांग्रेसको केन्द्रीय कार्यसमिति कुल २९७ सदस्यीय हुनेछ, जसमध्ये ६६ जना मनोनीत हुनेछन्।

पदाधिकारी संरचनातर्फ सभापति १, वरिष्ठ उपसभापति १, उपसभापति ४ (१ महिला अनिवार्य), महामन्त्री ३ (१ महिला अनिवार्य) र सहमहामन्त्री १५ (११ निर्वाचित र ४ मनोनीत) रहने व्यवस्था कायम गरिएको छ।

राजनीतिक प्रतिवेदन तथा विधान संशोधनका प्रमुख विशेषता