भोटेकोशी बाढी : १ हजार ४ सय ५३ जनाको शव फेला, ४ हजार ७१८ जना अझै बेपत्ता

काठमाडौँ, असोज ९ गते । रसुवाको भोटेकोशीमा आएको विनाशकारी बाढीका कारण शुक्रबार बिहान ११ बजेसम्म १ हजार ४ सय ५३ जनाको शव फेला परेको नेपाल प्रहरीले जनाएको छ। प्रहरीका अनुसार बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनको काम जारी छ।

नेपाल प्रहरीका अनुसार रसुवामा २३६, नुवाकोटमा २०४, धादिङमा ७२, चितवनमा ३६८, गोरखामा ७९, तनहुँमा ३८, नवलपरासी पूर्वमा २३२ र नवलपरासी पश्चिममा २२२ जनाको शव फेला परेको छ। यसबाहेक काठमाडौंमा उपचारका क्रममा दुई जनाको मृत्यु भएको विवरण प्रहरीले सार्वजनिक गरेको छ।

फेला परेका शवको पहिचानका लागि डीएनए नमुना संकलनसहित आवश्यक प्रक्रिया अघि बढाइएको छ। हालसम्म १ हजार ३ सय ३४ शव व्यवस्थापन गरिएको प्रहरीले जनाएको छ। मृतकका १ हजार ३२९ र आफन्तका २ हजार ६० गरी कुल ३ हजार ३८९ वटा डीएनए नमुना संकलन गरिएको छ। पहिचान नभएका १ हजार ४२१ शवको विवरण नेपाल प्रहरीको वेबसाइटमा राखिएको पनि प्रहरीले जनाएको छ।

बाढी प्रभावित क्षेत्रमा उद्धार, खोजी, राहत वितरण र शव व्यवस्थापनलगायतका कार्यका लागि हालसम्म ७ हजार ९७५ जना प्रहरी कर्मचारी परिचालन गरिएको छ। अझै ४ हजार ७१८ जना बेपत्ता रहेको र उनीहरूको खोजी भइरहेको प्रहरीले जनाएको छ। विभिन्न जिल्लामा रहेका होल्डिङ सेन्टरमा १ हजार २०५ जना राखिएका छन्।

दर्जनौँ सडकखण्ड प्रभावित

भारी वर्षा, बाढी र पहिरोका कारण देशका विभिन्न प्रमुख सडकखण्डमा आवागमन प्रभावित भएको नेपाल प्रहरीले जनाएको छ।

रसुवाको पासाङ ल्हामु सडकखण्ड पूर्ण रूपमा अवरुद्ध रहेको छ। त्रिशूली नदीको कटान तथा पछिल्लो विनाशकारी बाढीका कारण सडकको ठूलो भाग नष्ट भएको प्रहरीले जनाएको छ। रसुवा–नुवाकोटको मुख्य राजमार्ग पनि प्रभावित भएपछि स्याफ्रुबेंसीसम्म पुग्न काठमाडौं–टोखा–छहरे–विदुर–धुन्चे हुँदै सिंगल लेनको कच्ची वैकल्पिक सडक प्रयोग गर्न सकिने व्यवस्था रहेको छ।

त्यस्तै, धादिङको पृथ्वी राजमार्ग, काभ्रेको बीपी राजमार्ग, ओखलढुंगाको सिद्धिचरण लोकमार्ग र मनाङको चामे–बेंसीसहर सडकखण्ड समेत पहिरो तथा बाढीका कारण पूर्ण रूपमा अवरुद्ध भएको प्रहरीले जनाएको छ।

काभ्रेको रोशी गाउँपालिका–७ चारसयबेँसी र रोशी–८ गिम्दीबेँसीमा पहिरो खस्दा बीपी राजमार्ग दुवैतर्फ अवरुद्ध भएको छ। ओखलढुंगाको मानेभञ्ज्याङ गाउँपालिका–६ र ७ को सीमामा भँडारे खोलामा लेदोसहितको बाढी आएर सडकमा क्षति पुगेपछि सिद्धिचरण लोकमार्ग अवरुद्ध भएको छ।

मनाङको नासों गाउँपालिका–३ खोत्रोमा ढुंगासहितको पहिरो खस्दा चामे–बेंसीसहर सडक पूर्ण रूपमा अवरुद्ध भएको प्रहरीले जनाएको छ।

केही सडकमा रातिको आवागमन बन्द

भारी वर्षा र पहिरोको जोखिमलाई ध्यानमा राख्दै विभिन्न जिल्लामा निश्चित समयका लागि सवारी आवागमनमा रोक लगाइएको छ।

नुवाकोटको टोखा–छहरे सडकमा अत्यावश्यक सेवाबाहेकका सवारी साधन राति १० बजेदेखि बिहान ५ बजेसम्म सञ्चालनमा रोक लगाइएको छ। सोलुखुम्बुमा सिद्धिचरण लोकमार्ग तथा अन्य भित्री सडकमा साँझ ६ बजेदेखि बिहान ६ बजेसम्म अत्यावश्यकबाहेकका सवारी तथा पैदल यात्रुको आवागमन रोकिएको छ।

दाङका तुलसीपुर–कपुरकोट, भालुवाङ–गनाहा खोला, घोराही–होलेरी, घोराही–मुर्कुटी र तुलसीपुर–कालीमाटीलगायत सडकखण्डमा पनि साँझदेखि बिहानसम्म आवागमन बन्द गर्ने व्यवस्था गरिएको छ।

यस्तै मनाङ, सिन्धुली, दोलखा, काभ्रे र सिन्धुपाल्चोकलगायत जिल्लामा पनि बाढी तथा पहिरोको जोखिमलाई ध्यानमा राख्दै विभिन्न सडकखण्डमा समय तोकेर आवागमनमा रोक लगाइएको छ।

मकवानपुरमा पृथ्वी राजमार्ग तथा कान्ति राजमार्ग प्रभावित भएपछि त्रिभुवन राजपथमार्फत निश्चित समय तालिकाअनुसार सवारी सञ्चालन गर्ने व्यवस्था गरिएको छ। लामो तथा बढी भार भएका केही मालवाहक सवारीलाई उक्त सडक प्रयोगमा रोक लगाइएको छ।

नेपाल प्रहरीले भारी वर्षा तथा बाढी–पहिरोको जोखिम रहेका क्षेत्रमा आवश्यक सतर्कता अपनाउन तथा सम्बन्धित निकायले जारी गरेका सडक आवागमनसम्बन्धी सूचनाको पालना गर्न आग्रह गरेको छ।

स्रोत : नेपाल प्रहरी