अविरल वर्षाले राजमार्ग बन्द: सार्वजनिक सवारी काठमाडौँमै रोकिए, करिडोरमा पार्किङ नगर्न अपिल

काठमाडौँ, असोज ९ गते । बिहीबारदेखि जारी अविरल वर्षाका कारण देशका विभिन्न भागबाट काठमाडौँ जोड्ने प्रमुख राजमार्गहरू अवरुद्ध हुँदा सार्वजनिक सवारीसाधनहरू काठमाडौँमै रोकिएका छन्। पृथ्वी राजमार्ग र बीपी राजमार्गका विभिन्न स्थानमा पहिरो जाँदा सडक सम्पर्क विच्छेद भई जन-जीवन प्रभावित बनेको छ।

काठमाडौँ उपत्यका ट्राफिक प्रहरी कार्यालयका अनुसार काठमाडौँ जोड्ने मुख्य सडकहरू बन्द भए पनि हेटौँडा जाने फर्पिङको बाटो भने सञ्चालनमा रहेकाले साना सवारीसाधन आवतजावत गरिरहेका छन्। नयाँ बसपार्क सञ्चालक लोत्से बहुउद्देश्यीय प्रा.लि.का अनुसार बाढी र पहिरोका कारण अधिकांश लामो दूरीका बसहरू बसपार्क परिसरमै थन्किएका छन्।

यसैबिच उपत्यकाका खोला तथा नदीहरूमा जलसतह क्रमशः बढ्दै गएपछि ट्राफिक प्रहरीले नदी करिडोर क्षेत्रमा सवारीसाधन नरोक्न र पार्किङ नगर्न माइकिङ सुरु गरेको छ। असोज ८ देखि १२ गतेसम्म देशका विभिन्न भागमा भारी वर्षा हुने मौसम पूर्वानुमान रहेकाले उच्च सतर्कता अपनाउन सर्वसाधारणलाई अपिल गरिएको छ।

नेपाल यातायात व्यवसायी राष्ट्रिय महासङ्घले पनि राजमार्गहरूमा पहिरोको जोखिम उच्च रहेकाले सुरक्षा निकायसँग अनिवार्य समन्वय गरेर मात्र आवतजावत गर्न सम्पूर्ण यातायात व्यवसायी तथा चालकहरूलाई आग्रह गरेको छ।