मौसमी विपद्को जोखिमप्रति प्रधानमन्त्रीको चासो: पूर्वसतर्कता र पूर्वतयारी अपनाउन निर्देशन

काठमाडौँ, असोज ७ गते । प्रधानमन्त्री वालेन्द्र शाहले सम्भावित मौसमी विपद्को जोखिमलाई ध्यानमा राख्दै सम्बन्धित सम्पूर्ण निकायहरूलाई आवश्यक पूर्वतयारी, समन्वय तथा सतर्कता अपनाउन आग्रह गर्नुभएको छ।

आज सामाजिक सञ्जालमार्फत उहाँले जल तथा मौसम विज्ञान विभागको पूर्वानुमान अनुसार असोज ९ देखि ११ गतेसम्म हुन सक्ने भारी वर्षाप्रति सम्पूर्ण नागरिकलाई सुरक्षित र सचेत रहन अनुरोध गर्नुभयो।

विभागका अनुसार गण्डकी र लुम्बिनी प्रदेशका केही स्थानहरूमा भारीदेखि अति भारी वर्षा तथा कोशी, बागमती, मधेश, कर्णाली र सुदूरपश्चिम प्रदेशका केही स्थानमा पनि धेरै भारी वर्षाको सम्भावना छ। विशेष गरी गण्डकीको पोखरा, लुम्बिनीको तराई र पहाडी क्षेत्र, कोशीको ताप्लेजुङ, बागमतीको पहाडी खण्ड, कर्णालीको जुम्ला र सुदूरपश्चिमका पहाडी भूभागमा बाढी, पहिरो र डुबानको उच्च जोखिम औँल्याइएको छ।

मौसममा आउने यस्तो परिवर्तनका कारण सडक तथा हवाई यातायातमा अवरोध पुग्न सक्ने, नदीनालामा बाढी आउन सक्ने र गेग्रान बहावको खतरा रहने हुनाले विभागले सतर्कता अपनाउन आह्वान गरेको छ।

साथै, ट्रेकिङ तथा हिमाली क्षेत्रको भ्रमणमा जाने योजना बनाएका पर्यटक तथा सर्वसाधारणहरूलाई मौसम सुधार नभएसम्म यात्रा स्थगित वा पुनर्विचार गर्न, स्थानीय प्रशासन र विभागको सूचना नियमित रूपमा पालना गर्न पनि अनुरोध गरिएको छ।